Anyang er ein by i det nordaustlege Kina i provinsen Henan, 475 kilometer sørvest for Beijing. Han er i dag ein handels- og industriby ved jernbanelinja mellom Beijing og Guangzhou, med kring 3 millionar innbyggjarar. Det fins rike førekomstar av kol, jernmalm og marmor, og industrien omfattar kjemikalieproduksjon, stålverk og bomullsveveri.
Anyang
Historie
Innanfor grensene til Anyang ligg ruinane til hovudstaden i Shang-dynastiet. Tradisjonelt var den historiske byen kjend under namnet Yin (殷), som òg var eit eponym for Shang-dynastiet sjølv. I samtida si gjekk byen under namnet Da’yi Shang («Shangs store hovudstad») og Shang-yi («Shang-hovudstaden»).
Arkeologiske utgravingar i Anyang som starta i 1928, har bringa for dagen ei rekkje fortidsminne frå Shang-perioden. Det første og viktigaste arkeologiske funnet var dei såkalla orakelbeina, oppdaga i 1899. Dei stammar frå ca. 1200 til 1046 fvt. og utgjer det tidlegaste eksempelet vi har på kinesisk skrift.
Etter kvart vart det gjort fleire funn av mellom anna bronseartefaktar, bymurar og kongegraver, og byen vart òg identifisert som den siste hovudstaden til Shang-dynastiet. Før hadde byen vore nemnd i andrehandsforteljingar, men aldri historisk bevist.
Faktisk tilhørte Shang-dynastiet som heilskap mytologien før ruinane i Anyang vart avdekte. Mykje av mytologien vart stadfesta av funna og vart gjennom dei historie.
Les meir i Store norske leksikon
Litteratur
- United Nations, Department of Economic and Social Affairs, Population Division (2014). World Urbanization Prospects: Population of Urban Agglomerations with 300,000 Inhabitants or More in 2014, by Country, 1950-2030
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.