Kristin Sørsdal

Kristin Sørsdal har hovudfag i italiensk frå Universitetet i Bergen 2005.

Frå 1985 til 1988 budde Sørsdal i Napoli i Italia. Ho har seinare arbeidd som lærar.

Sørsdal debuterte som forfattar med romanen Makabre bikkjer i 2010. Etter dette har ho gitt ut romanane Guds hund (2013) og Mare (2017). I Mare skriv ho om situasjonen til flyktningar i Europa, sett gjennom auga til ei norsk kvinne som reiser til Lampedusa, den vesle italienske øya som er sentrum for flyktninginvasjonen i Europa. Sørsdal viser den lokale dynamikken på øya og gir fleire perspektiv på tilværet der – og på dei som søkjer seg dit.

Då debutboka kom ut i 2010 hadde Sørsdal allereie omsett kriminalromanen Pericle den svarte (2008) av den italienske teikneserieskaparen og forfattaren Guiseppe Ferrandino. Sidan har ho drive vekselbruk mellom skriving og omsetjing. Ho har stått for omsetjingar av ei rekkje av bøkene til den italienske forfattaren Elena Ferrante. Den såkalla «Napoli-kvartetten» kom ut på nynorsk mellom 2015 og 2017, og seinare har ho omsett Den dunkle dottera (2017), Svikne dagar (2017), Kvelande kjærleik (2018) og Dei vaksnes løgnaktige liv (2020), og barneboka Natt på stranda (2017).

Romanane til Ferrante har vore både kritikar- og salssuksessar i Noreg, og dei er gjennomgåande og djupt prega av Sørsdal sin presise og levande nynorsk. Språket til Ferrante er rikt og vitalt, og gjennom eit samvitsfullt arbeid med ordval og setningsmelodi har Sørsdal makta å overføre det til ein tilgjengeleg og medrivande nynorsk.

I 2016 fekk Sørsdal Målprisen frå Noregs Mållag. I 2017 fekk ho Kritikarprisen for beste omsetjing for det siste bandet i «Napoli-kvartetten», Historia om det tapte barnet (2016). Under Litteraturdagane i Vinje i 2017 fekk ho også Storegutprisen for arbeidet med Ferrante sine bøker.

• omsetjing
• Elena Ferrante
• italiensk
• nynorsk

• Det Norske Samlaget si forfattarside om Kristin Sørsdal
• Skald forlag si forfattarside om Kristin Sørsdal