Faktaboks

Mette Karlsvik
Fødd
28. november 1978, Bodø, Nordland
Levetidskommentar
Oppvaksen på Frei, Møre og Romsdal
Mette Karlsvik.
Av /Samlaget.

Mette Karlsvik er ein norsk forfattar og journalist.

Bakgrunn

Mette Karlsvik er fødd i Bodø i Nordland og voks opp på FreiNordmøre i Møre og Romsdal. Ho tok vidaregåande skuleUnited World College Red Cross Nordic i 1995—1997. Ho har studert kunsthistorie ved NTNU (1997–1998), tok bachelorgrad i biletkunst frå Glasgow school of Art (1998–2002), Skrivekunstakademiet i Hordaland (2003–2004), illustrasjonsstudiet ved Norges kreative fagskole (no Høgskulen Kristiania) (2004–2005), bachelorgrad i journalistikk ved Universitetet i Bergen (2005–2007) og dramatikarutdanninga til Norsk barnebokinstitutt (2010–2011).

Forfattarskapen

Karlsvik debuterte i 2005 med romanen Vindauga i matsalen vender mot fjorden, som handlar om ei jente med anoreksi. Den 90 sider lange romanen Flytårn, om ein flygeleiar på Kvernberget flyplass, blei utgitt i 2007, og i romanen Pol (2008) prøver hovudpersonen å få arbeid i Bergens Tidende.

Karlsvik gav ut barneboka 1–2–TRE i 2009. Det er ei fabulerande historie om miljø, vennskap og tre elleve år gamle jenter. Ho er representert i fleire antologiar, og ho skriv reisehandbøker for forlaget Grieg. Ho skriv energisk, sprudlande og kreativt med korte setningar og eit oppfinnsamt språk.

I 2011 kom den første sakprosaboka hennar, Post oske. Dagar og netter i Reykjavik. Boka handlar om Island etter finanskrisa og vulkanutbrotet. Romanen Bli Björk (2011) handlar om Island på 1990-talet og om songartisten Björk sin barndom og ungdom fram til gjennombrotet hennar. Også den illustrerte romanen Prinsland (2012), illustrert av Svein Størksen, og romanen Varmá (2016) handlar om Island. Ho har også gitt ut teikneserien Kjøt (2018) saman med illustratør Tord Torpe og fleire andre romanar.

Verv og anna engasjement

Karlsvik var styremedlem for Den norske Forfatterforening frå 2011 til 2019, og har også vore tillitsvald i Bjørnsonakademiet, Dramatikerforbundet og Norsk faglitterær forfatter- og oversetterforening, og var frå 2015 til 2020 leiar for ein komité i Statens Kunstnerstipend. Sidan 2018 har ho vore juryleiar for Vindorn poesipris. Karlsvik har arbeidd som journalist i mellom anna Morgenbladet, Dagens Næringsliv, Dagsavisen og Bergens Tidende. Frå 2010 jobba ho med informasjonsarbeid for Den norske Forfatterforening. Karlsvik var leiar for Norsk sakprosafestival i 2018 og 2019, og har sidan 2020 vore rådgjevar i seksjon for visuell kunst i Norsk kulturråd.

Utmerkingar

Karlsvik fekk Tarjei Vesaas' debutantpris for Vindauga i matsalen vender mot fjorden i 2005. I 2011 fekk ho Sigmund Skard-stipendet, og i 2012 fekk ho både Stig Sæterbakkens Minnepris og Bokhandelens forfatterstipend, samt målprisen til Nordmøre Mållag. I 2013 fekk ho Skien kommunes kunstnerstipend.

Bibliografi

  • Same tid neste veke : samtaler med Thorvald Steen (Pax, 2021)
  • Meieriet (Roman, Samlaget, 2019)
  • Kjøt (Magikon, 2018)
  • Mørkerom (Roman, Samlaget, 2017)
  • Varmá (Roman, Samlaget, 2016)
  • UR (Lyrikk, Spriten forlag, 2015)
  • Dyrebar (Barnebok, Magikon, 2014)
  • Den beste hausten er etter monsun (Roman, Samlaget, 2014)
  • Øy/Ey (Roman, House of Foundation, 2013)
  • Vekstvilkår (Essays, Spriten forlag, 2013)
  • Prinsland (Roman, Magikon, 2012)
  • Post Oske/ Dagar og netter i Reykjavik (Dokumentar og historie, Flamme, 2011)
  • Bli Björk (Roman, Samlaget, 2011)
  • 1-2-TRE (Barnebok, Samlaget, 2009)
  • Pol (Roman, Samlaget, 2008)
  • Flytårn (Roman, Samlaget, 2006)
  • Vindauga i matsalen vender mot fjorden (Roman, Samlaget, 2005)

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg