Torill Eidsheim

Torill Eidsheim er fødd i Lindås (no Alver) i Hordaland (no Vestland). Ho gjekk på Lindås gymnas i 1986–1990, med eit utvekslingsår i USA. I 1991–1994 tok ho utdanning i visuell kommunikasjon på Garnes vidaregåande skule og i 1997 tok ho utdanning i webdesign, organisasjonspsykologi og leiing ved Høgskolen i Bergen (no Høgskulen på Vestlandet) og Handelshøyskolen BI.

Ho var assistent i Eknes Designbyrå i 1994–1995 og kunstnarisk leiar i Eknes og Scholz Reklamebyrå i 1995–1997. Ho arbeidde deretter eitt år som frilans formgivar, før ho var marknadskonsulent i avisa Hordaland i 1998–2003. Frå 2003 til 2010 var ho marknadssjef i Hillesvåg Ullvarefabrikk og frå 2010 dagleg leiar i Skram Media.

Som ungdom var ho medlem i Nordhordland Unge Høgre. I 1999–2003 sat ho i Radøy kommunestyre for Høgre. Ho var medlem av fylkestinget i Hordaland i 2007–2011, der ho var fraksjonsleiar for Høgre i samferdselsutvalet. I 2011 vart ho nestleiar i Hordaland Høgre.

Eidsheim var vararepresentant på Stortinget i perioden 2009–2013 og var vald inn som stortingsrepresentant for Høgre frå Hordaland i 2013–2021. Ho var medlem i transport- og kommunikasjonskomiteen på Stortinget i 2013–2017, i helse- og omsorgskomiteen i 2017–2020 og i kommunal- og forvaltningskomiteen i 2020–2021. Ho blei ikkje renominert for stortingsvalet i 2021. Ho har vore saksordførar for fleire saker som handlar om digital infrastruktur og IKT-system for samferdsel og helsevesen. Ho er òg aktiv i fylkespartiet i Hordaland, både som tillitsvald og som aktivist.

• Høgre
• Stortinget
• Stortingsrepresentantane 2017–2021
• vararepresentant

• Stortinget: Torill Eidsheim