Aud Søyland er ein norsk språkkonsulent, omsetjar, forfattar og folkemusikar.
Ho har redigert Nynorsk ordliste sidan 1999. I 2010–2011 var ho sekretær for Riise-nemnda, som arbeidde fram ei ny nynorsk rettskriving, og ho har vore sentral i arbeidet med å gjere nynorsken meir moderne og rettskrivinga enklare.
Ho er utdanna cand.philol. frå Universitetet i Oslo i 1983, med hovudfag i nordisk språk. I perioden 1984–1986 arbeidde ho i Norsk språkråd. Sidan har ho arbeidd frilans som språkvaskar, omsetjar og forfattar.
Søyland har vore engasjert i målrørsla heilt frå ungdomen. I 1976 var ho leiar i Studentmållaget i Oslo, i 1981–1982 leiar i Norsk Målungdom. Ho sat i styret i Noregs Mållag i 2007–2012 og var nestleiar i 2009–2012. Sidan 2013 har ho vore leiar av Nord-Aurdal Mållag, og ho er forlagssjef for det mållagseigde forlaget Kvitvella.
Søyland har vore redaktør for ei rekkje utgåver av Nynorsk ordliste, saman med ulike medredaktørar. Ho har skrive lærebøker og regelbøker, mellom andre Norske skrivereglar. Reglane du treng for å skrive på papir og skjerm, som ho gav ut i 2015 saman med Jan Olav Fretland.
Ho debuterte i 1981 med antologien Eg gjekk meg opp til seterli – stølsliv i poesi og prosa, som ho redigerte saman med Anne-Kari Skarðhamar. Ho leverte hovudfagsoppgåva «La hundre blomar bløma. Ei gransking av amatørdikting i Hallingdal i dag» i 1983. På bakgrunn av denne oppgåva gav ho, saman med Eldgrim Hagen, i 2015 ut antologien Dikt frå dalen, med utvalde dikt frå Hallingdal. Saman med ektemannen Bjørn Karsrud gav ho ut barneboka Full rulle på norske spor i 2004, i høve 150-årsjubileet for norsk jernbane.
Ho spelar langeleik, er med i folkemusikkmiljøet og har hatt ei viktig rolle i Strunkeveko, Jørn Hilme-stemnet og Landskappleiken.
Ho vart heidersmedlem i Litteraturselskapet Det Norske Samlaget i 2012. I 2013 vart ho heidra med kulturprisen for Nord-Aurdal, og i 2016 fekk ho Haldor Røynes ærespris for arbeidet med folkemusikk i Valdres.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.