Faktaboks

Bård Aasen Lødemel

«Skatebård» eller «Sirkel Sag»

Fødd
14. mai 1976, Harstad
Bård Aasen Lødemel.
Bård Aasen Lødemel.
Av /SCANPIX.

Bård Aasen Lødemel er DJ, produsent og artist innanfor elektronisk musikk. Han er òg medlem av rapgruppa Side Brok. Han er òg kjend under namnet Sirkel Sag.

Bakgrunn

Bård Aasen Lødemel er fødd i Harstad, men voks opp i Volda og Hovdebygda i Ørsta. Frå 1992 til 1995 gjekk han på Volda vidaregåande skule, frå 1995 til 1996 Viken folkehøgskole, før han tok nordisk og engelsk grunnfag ved Høgskulen i Volda (1997–1999) og sosialantropologi grunnfag ved Universitetet i Bergen (2001).

Musikkarrieren

Med artistnamnet Skatebård gav han i 2002 ut sitt første soloalbum, Skateboarding was a Crime (in 1989). Sidan har Skatebård gitt ut album, vinyl-EP‑ar og ei rekkje remiksar. For albumet Cosmos (2008) vart han nominert til Spellemannprisen i klassen elektronika.

Skatebård lagar fengjande elektronisk musikk, der albuma gjerne framstår som eit heilt DJ‑sett. Discorytmane er intense, og dei repeterande elementa frå synthesizeren gjer at albuma som heilskap får ein suggerande effekt.

Saman med Runar Gudnason, alias Sjef R / Thorstein Hyl III, var Aasen Lødemel med og etablerte hiphop-gruppa Side Brok i 2000. I ulike konstellasjonar, der Lødemel er backup-rappar og ansvarleg for rytmekomp, har Side Brok gitt ut fire album og fleire singlar. Side Brok rappar på sunnmørsdialekt, og dei vart kåra til Årets nynorskbrukar av Nynorsk kultursentrum i 2004. Med utspring i Side Brok har Aasen Lødemel saman med Gudnason også etablert fantasifiguren Sirkel Sag. I 2016 gav Sirkel Sag ut EPen Ørsta Rådhus.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg