Inge Bremnes er ein norsk artist og låtskrivar frå Kvæfjord. Bremnes lagar gitarbasert populærmusikk med innslag av indie, soul og elektronika. Tekstane er på nordnorsk.
Musikkmeldarane har rost Bremnes for korleis han nyttar kontrasten mellom det stillferdige og det kraftfulle. Både i tekst, melodi og formidling er Bremnes i slektskap med artisten Moddi og rockebandet Kråkesølv, som òg er frå Nord-Noreg.
Inge Bremnes er fødd i Kvæfjord. Han er son til artisten Ola Bremnes og bror til artisten Kaja Bremnes, og nevø av Kari Bremnes. Frå 2008 til 2011 gjekk han musikklinja ved Heggen videregående skole i Harstad. Frå 2013 til 2015 var han student ved Liverpool Institute for Performing Arts.
Bremnes debuterte med låta «Sne» i 2014. Poplåtar som «Ka du håpa på» (2015) og «Ikaros» (2016) blei mykje spelt på norske radiokanalar. Den sistnemnde låta er også med på debutalbumet Mellomspill (2017), som kom i 2017. I 2018 gav Bremnes ut singlane Himmelblå og La det vær og albumet Har det no å si, som òg vart mykje spela i radio. Bremnes kom med albumet Vanedyr/Skadedyr i 2021.
Låtane på Mellomspill handlar om overgangane i livet vårt, som kan vere både fine og triste. Tekstuniverset til Bremnes krinsar rundt konkrete handlingar om folk ein møter på trikken, eller dei skildrar ei kjensle. Melodiane har mykje klang og harmoni og kan kallast atmosfærisk populærmusikk.
Bremnes har også popduoen Feber saman med Helle Larsen. Dei ga ut albumet Can I Get Some Adult Supervision? i 2024.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.