Hopp til innhold
X
Innhald

Marcus Kabelo Møll Mosele, «Kamelen»

Marcus Kabelo Møll Mosele, betre kjend som «Kamelen», er ein kontroversiell rappar frå Bergen.

Marcus Kabelo Møll Mosele er fødd i 1993 i Bergen. Han bruker artistnamna Slim Kamel og Kamelen. Kamelen debuterte med låten «Si ingenting» i 2015. Sidan har rapparen gitt ut låtar som «Kjeltring» (2016), «Hon e fin» (2018) og «Vil ba vekk» (2019). I 2017 kom albumet Ambivalent.

Tekstuniverset krinsar om forholdet mellom mann og kvinne. Han er kritisk til korleis makthavarane, og då særleg politiet, bruker makta si. Det ser vi til dømes i låten «Si ingenting». Eit underliggjande tema i tekstane hans er draumen om ein dag å leve eit lovlydig liv. Kamelen rappar på dialekt, men har mange innslag av slang frå andre språk, til dømes arabisk og engelsk.

Han vart nominert i klassen årets gjennombrot under Spellemannspris-utdelinga i 2018.

Kamelen hamna i nyhendebiletet også utanfor det norske rappmiljøet då han i 2015 prøvde å stikke av frå varetektsfengsel. I 2017 avslutta han ei tjue månader lang fengselsstraff for vald.

 

Kjelder

Anne Aase Rokkan: «Ka me Kamelen?», stoffmagasin.no, publisert 16.11.2017: https://www.stoffmagasin.no/2017/11/16/ka-me-kamelen/ [lesedato 3.11.2019]

Marie Mundal: «Åpner opp om sønnen», ba.no, publisert 10.5.2019: https://www.ba.no/pulsen/musikk/kultur/apner-opp-om-sonnen/s/5-8-1048217 [lesedato 3.11.2019]

Marie Skarpaas Karlsen: «Rapperen har ingen planer om å melde seg for politiet nå», ba.no, publisert 12.10.2015: https://www.ba.no/nyheter/kriminalitet-og-rettsvesen/politi/rapperen-har-ingen-planer-om-a-melde-seg-for-politiet-na/s/5-8-174135 [lesedato 3.11.2019]

 

Peikarar

Kamelen, «Kjeltring», youtube.com

Først publisert: 06.01.2021
Sist oppdatert: 06.01.2021