Norske band, kor, orkester og kompani

Adjágas er ei ung samisk musikkgruppe som har greidd å tilføre joik og samisk musikk ein ny dimensjon.

Boknakaran, ei nordnorsk visegruppe med visesongarar som er busette i Tromsø. Namnet «Boknakaran» reflekterer den nordnorske fiskedelikatessa «boknafesk».

Carte Blanche, nasjonalt kompani for samtidsdans. Carte Blanche har fire eller fem produksjonar i året og samarbeidar med ei rekkje internasjonale koreografar.

 

Dei nye kapellanane, band der forfattaren Ragnar Hovland er frontfigur. Kapellanane spelar populærmusikk på nynorsk under mottoet «rock & roll med eit menneskeleg andlet».

Dænsebændet, danseband frå Snertingdal som har gitt ut 16 album og vorte eit av dei mest populære norske dansebanda på 2000-talet.

Fabel er ei visepopgruppe frå Nordfjord som gav ut fire plater frå 1996 til 2001.

Fliflet/Hamre, musikarduo med trekkspel, perkusjon, song og humor. Med bakgrunn i folkemusikk og jazz kryssar Fliflet/Hamre dei fleste musikalske tradisjonsgrenser.

Folk & Røvere, oslobasert, norskspråkleg trip-hop/elektronika-band.

Gatas Parlament er ei kommunistisk hiphopgruppe frå Oslo, som var dei første til å gi ut norskspråkleg rap. Dei har ofte fått mykje mediemerksemd for dei sterke meiningane sine.

Hekla Stålstrenga er ei nordnorsk gruppe som spelar folkemusikkinspirert populærmusikk og syng på dialekt. Gruppa framfører songar skrivne av Ola Bremnes og Helge Stangnes.

Jaa9 & OnklP, rapduo frå Lillehammer som har gitt ut to album og fleire singlar og mix-tapar, kjende for rappkjefta, frekke meldingar på folkeleg austlandsmål.

Kaizers Orchestra, norsk musikkgruppe som blandar rock, pop og punk med aust- og sentraleuropeiske musikktradisjonar, og som har oppnådd internasjonal suksess med tekstar på norsk dialekt.

Kjerringrokk, feministisk musikkgruppe som var aktiv midt i 1970-åra. Gruppa var den første i Noreg til å gi ut ei kvinnepolitisk LP-plate på eit kommersielt plateselskap.

Kråkesølv er ei nordnorsk gruppe som spelar energisk poprock med melodisk teft. Tekstane deira er leikne og oppfinnsame, og dei blir framførte på bodødialekt.

Leif & Kompisane, rockgruppe frå Stavanger, aktiv sidan 1984, med pause 1986–1993, kjend for lette, sommarlege popsongar som «Dronninga» og «Morgen Herlege».

Majorstuen, norsk folkemusikkgruppe som nyttar tradisjonsmateriale som grunnlag for nye og særeigne komposisjonar for felemusikk.

Seigmen, norsk rockband som vart danna i 1989. Bandet fekk gjennombrotet i 1994 med plata Total og EP-en Hjernen er alene.

Sunnmøre Baarelag, blues- og rockeband frå Ørsta, aktivt sidan 1980, som har gitt ut tre album med country-inspirert rock på sunnmørsdialekt.

Vassendgutane, countryband frå Åmdalen i Ørsta. Med humoristiske og uhøgtidelege tekstar på dialekt har Vassendgutane gitt ut fleire album og har opplevd stor kommersiell suksess.