Hopp til innhold

Hekla Stålstrenga

Hekla Stålstrenga er ei nordnorsk gruppe som spelar folkemusikkinspirert populærmusikk og syng på dialekt. Gruppa framfører songar skrivne av Ola Bremnes og Helge Stangnes.

Hekla Stålstrenga vart etablert i 2005. Initiativtakarane til gruppa var felespelar Ragnhild Furebotten og gitarist Tore Bruvoll. Dei har vore ein duo som har spela og komponert musikk saman sidan gymnastida i Tromsø. I Hekla Stålstrenga fekk dei med seg Trond-Viggo Solås på kontrabass, Ole-Jakob Larsen på trommer og Lena Kristin Ellingsen som vokalist. Anne Nymo Trulsen tok over som vokalist i 2007. Gruppa har gitt ut albuma Hekla Stålstrenga (2008), Makramé (2011) og Dyrandé (2013).
(Artikkelen held fram under biletet)
Hekla Stålstrenga på Dei nynorske festspela 2013. Foto: Kjell Arne Steinsvik/ Ivar Aasen-tunet
Hekla Stålstrenga på Dei nynorske festspela 2013. Foto: Kjell Arne Steinsvik/ Ivar Aasen-tunet
Hekla Stålstrenga er ei folkrockgruppe som vandrar mellom fleire musikalske sjangrar, men først og fremst spelar dei akustisk og energisk populærmusikk som er inspirert av tradisjonsmusikken. Eit kjenneteikn er at dei vidarefører folkemusikkarven frå Nord-Noreg. Ei viktig musikalsk inspirasjonskjelde er komponist og felespelar Hans Haugen frå Susendal i Nordland.
Fela er òg eit sentralt instrument i musikken til Hekla Stålstrenga. Mange av songane til gruppa er skrivne og komponerte av Ragnhild Furebotten og Tore Bruvoll. Dei komponerer gjerne ny musikk til gamle nordnorske tekstar. I tillegg har gruppa eit tett samarbeid med artisten Ola Bremnes frå Svolvær og diktaren Helge Stangnes frå Senja. Bremnes har skrive songar som «Har du fyr» (2011), og Stangnes har skrive teksten til «Vise ved vintersolkverv» (2013).
Sjå Hekla Stålstrenga framføre "Har du fyr":

Kjelder
Nettstaden til Hekla Stålstrenga, heklastalstrenga.no: http://www.heklastalstrenga.no/ [lesedato 29.9.2013]
Hekla Stålstrenga, omtale på folkemusikk.no: http://www.folkemusikk.no/hekla-staalstrenga.4646319-146037.html [lesedato 28.9.2013]
Heimesida til Ragnhild Furebotten, furebotten.com: http://www.furebotten.com/ [lesedato 29.9.2013]
Peikarar

Først publisert: 20.03.2014
Sist oppdatert: 13.02.2017