Hopp til innhold

Asbjørn Toms

Asbjørn Toms var skodespelar, instruktør og forfattar. I samarbeid med Alf Prøysen stod Toms bak ei suksessrik dramatisering av Prøysens roman Trost i taklampa.

Asbjørn Toms var fødd 20. oktober 1915 i Bodø og døydde 2. april 1990 i Oslo. Han starta karrieren som statist i teateret, og han arbeidde som frilans skodespelar mellom 1934 og 1939. Han var tilsett ved Carl Johan-teatret i 1939–40 og ved Det Norske Teatret frå 1940 til 1986, då han gjekk av med pensjon. Han debuterte som skodespelar på Søilen teater, der han spela Benjamin i Strindbergs Påsk. Ved Det Norske Teatret hadde Toms ulike roller, og han spela til dømes i Shakespeares Stormen og i Ugo Bettis skodespel Dronning og rebell (1957).

Toms arbeidde etter kvart særleg som instruktør og forfattar. I 1945 sette Det Norske Teatret opp eventyrspelet Per Svein og lykkesteinane, som Toms hadde skrive. Han spela òg tittelrolla her. Sidan stod Toms bak ei rekkje oppsetjingar som dramatikar og instruktør. Særleg bar samarbeidet med Alf Prøysen mange frukter, som til dømes dramatiseringa av Trost i taklampa på Det Norske Teatret i 1952. Han samarbeidde òg med fleire andre forfattarar, mellom andre Vera Henriksen (Asbjørn Selsbane) og Kjell Aukrust (Dobbelsats og freske fraspark).

Toms spela rolla som Lorang i Leif Sindings film De vergeløse i 1939. Han har òg hatt nokre andre mindre roller i filmar og fjernsynsseriar.

Toms fekk tildelt Kongens fortenstemedalje i gull i 1986.

 

Kjelder

Herman Bertelsen (red.): Hvem er hvem i norsk kulturliv?. Oslo 1987

Heljar Mjøen og Nils Brantzeg (red.): Norske skuespillerportretter. Oslo 1969

Leif Mæhle: Det Norske Teatret 75 år. 1963–1988. Oslo 1988

 

Peikarar

Kjell Aukrust og Asbjørn Toms: Dobbelsats og freske fraspark (teaterbrosjyre). Oslo 1960. Tilgjengeleg i Bokhylla, nb.no

Vera Henriksen og Asbjørn Toms: Asbjørn Selsbane. Sogespel. Oslo 1972. Tilgjengeleg i Bokhylla, nb.no

Alf Prøysen og Asbjørn Toms: Sirkus Mikkelikski (manuskript). Oslo 1954. Tilgjengeleg i Bokhylla, nb.no

Først publisert: 21.10.2020
Sist oppdatert: 21.10.2020