Faktaboks

Ragnhild Foss

Ragnhild Antonia Maria Foss

Fødd
1883, Sokndal, Rogaland
Død
1952

Ragnhild Foss var ein norsk omsetjar og trygdefullmektig. Ho gjorde eit pionerarbeid med å omsetje kyrkjeleg norsk mellomalderdikting frå latin til nynorsk.

Ragnhild Foss arbeidde ei stund som lærarHadeland, før ho tok til å arbeide i trygdelaget Storebrand i Oslo. Der arbeidde ho mesteparten av livet, frå 1916 til 1943, dei siste åra som fullmektig.

Foss konverterte til katolisismen i 1929 og vart oppteken i Den katolske kyrkja same året. Etter kvart fekk ho ei brennande interesse for den kyrkjelege norske mellomalderdiktinga.

Denne interessa bar frukt i to omsetjingsverk: Latinske hymnor og sekvensar frå 1938 og Sekvensane i Missale Nidrosiense frå 1946. Begge kom ut på Det Norske Samlaget. Missale Nidrosiense var messeboka til Nidaros erkebispedøme og den første norske boka som vart prenta (i København i 1519).

3 av salmane Foss sette om, står i Norsk Salmebok, medan den katolske salmeboka Lov Herren har med så mange som 26.

Foss reiste mykje i Europa og Palestina og skreiv ymist i målbladet Noreg, i kvinnebladet Urd og i det katolske tidsskriftet St. Olav.

Les meir i Store norske leksikon

Litteratur

Breidsvoll, E. (1952): «Ragnhild Foss», i Norsk Allkunnebok, bd. 4. Oslo: Fonna

Faktaboks

Ragnhild Foss
Historisk befolkingsregister-ID
pf01037257001719

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg