Faktaboks

Erling Johnsen
Fødd
4. oktober 1892, Ytterøy, Trøndelag
Død
17. februar 1987, Oslo

Erling Johnsen var journalist og redaktør i Nationen og forfattar av forteljingar og gutebøker.

Bakgrunn

Johnsen vaks opp på StraumenInderøy Han likte å skrive og sende notisar om lokale saker til avisa InnherredSteinkjer frå 20-årsalderen. I minneartiklane sine skriv han at hendingane i 1905, då Noreg gjekk ut av unionen med Sverige, sette djupe spor i sinnet til 13-åringen.

Johnsen gjekk folkeskulen på Sakshaug og hadde mellom anna Olav Duun som lærar. Etter det tok han eit år på Sund Folkehøgskule på Inderøy.

Presse

Notisane i Innherred førte til at han blei tilsett og fekk læreår som redaksjonshjelp i avisa i 1914. Etter eit lite mellomspel i Østlendingen i Elverum, som på den tida støtta Arbeiderdemokratene og Johan Castberg si rørsle på Austlandet, kom han i 1917 til Nidaros, under leiing av juristen Håkon Løken. Den radikale venstremannen og brukseigarsonen Løken var òg frå Inderøy. Johnsen blei eit år i Nidaros, fram til Norsk Landmannsforbund starta Nationen 9. desember 1918. Resten av arbeidslivet var han knytt til denne avisa som journalist og redaktør. Han slutta der i 1962. I alle desse åra arbeidde han spesielt med kulturstoff og skreiv teater- og bokmeldingar.

Forfattarskap

Den første boka hans kom i 1917, Sumarnætter. Det var ei samling forteljingar, skrivne på nynorsk. Han skreiv òg seinare nokre tekstar på nynorsk, men etter kvart blei bokmål språket hans både i journalistikken og i skjønnlitteraturen. I 1940- og 50-åra gav han ut fire barne- og ungdomsbøker med motiv frå barndomen på Straumen. Som pensjonist skreiv han ei rekkje artiklar i aviser og årbøker for historielag i Nord-Trøndelag.

Les meir i Store norske leksikon

Eksterne lenker

Litteratur

  • Sigrid Haavik: «Erling Johnsen – Straumgut og redaktør», Eynni Idri, årbok for Inderøy Museums- og historielag 2005
  • Kjell Saxvik: «Redaktør Erling Johnsen i minne», Årbok for Nord-Trøndelag historielag 1987

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg