Faktaboks

Øystein S. Ziener
Fødd
16. september 1957, Stange, Innlandet
Død
10. november 1998

Øystein S. Ziener var ein norsk litteraturforskar, forfattar og lyrikar som skreiv om kjærleik mellom menn.

Bakgrunn

Øystein S. Ziener var fødd i Vallset i Stange kommune i Hedmark (no Innlandet). Ziener tok hovudfag i litteraturvitskap ved Universitetet i Oslo i 1995 og skreiv hovudfagsoppgåva om den skeive danske forfattaren Herman Bang. Han forska på Bang og var stipendiat ved Institutt for nordistikk og litteraturvitskap ved Universitetet i Oslo då han døydde. Han var skribent mellom anna i Dag og Tid, Vagant, Løvetann og Blikk.

Forfattarskapen

Ziener skreiv om kjærleik mellom menn på ein open og direkte måte. Han debuterte med diktsamlinga Fanga. Fanga i flukta (1992), som handlar om homoseksualitet, å elske menn og finne identiteten sin. Så kom herifrå tel evigheta (1993), som skildrar livet i Vallset, deretter Mellom munnen: Mannen (1995) om homoseksuelle opplevingar og Dikt av en radbrekt dame (1996) om vrangsida av det kvinnelege. I 2006 blei eit utval av dikta hans gitt ut posthumt i samlinga Med splitta penn.

Ziener skreiv òg bøker i fleire andre sjangrar. Romanen Sykkelstativet. Og jeg (1997) er forteljingar om homofili. Han gav ut barnebøkene Klærne som gikk sin vei (1996) og – JEG? sa Ole (1997) om vennskap og angst. – JEG? sa Ole er omsett til tysk. Så innmari en sykkel kom i 1999 og er ei lyrisk biletbok for barn.

Boka Homoseksualitet? Homotekstualitet? Drift og skrift i Herman Bangs forfatterskap kom posthumt i 2001, og er ein analyse av forfattarskapen til den danske homoseksuelle forfattaren Herman Bang. Jørgen Lorentzen redigerte og gjennomarbeidde det uferdige manuset.

Les meir i Store norske leksikon

Litteratur

  • Eva Marie Syversen (red.): Resiproke som pronomen. Om Øystein S. Zieners forfatterskap. Vallset, 2007

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg