Sulaposten

Sulaposten blei grunnlagt i 1946, av Ansgar Slagnes (1905–1998). Han hadde bakgrunn frå industri og handel, og dreiv i lange periodar også ein kiosk som han nytta til ekspedisjons- og redaksjonslokale for avisa.

Det største problemet for Sulaposten var trykkinga. Dei første åra tok eit lokalt trykkeri i Langevåg seg av dette arbeidet, men så blei avisa sagt opp og måtte utanbygds for å bli trykt. I 1967 blei det så vanskeleg at Slagnes la ned avisa, og ho kom ikkje skikkeleg i gang igjen før i 1975.

Men heilt daud var avisa ikkje. Ved særskilde høve klarte Slagnes likevel å få gitt ut nokre spesialutgåver. Tidlegare var øya Sula, like sør for Ålesund, ein del av Borgund kommune. I 1965 blei Borgund slått saman med Ålesund, og Sula blei del av ein endå større kommune.

Etter samanslåinga med Ålesund fekk ei eiga bygdeliste for Sula stor oppslutning ved kommunevala. I 1969 såg kampanjen «Sula eigen kommune» dagens lys. Aktivistane meinte at dei fekk for lite tilbake av alle dei skattepengane som dei betalte til Ålesund. Sulaposten slutta heilhjarta opp om kampanjen, og heldt seg dermed i live. Sulaposten kom ut før kommunevala og gjorde særleg inntrykk med ei stor gratisutgåve då Tallaksen-komiteen (som skulle studere kommunestrukturen i landet) kom på besøk i 1974.

Frå årsskiftet 1974/1975 var Sulaposten igjen i full drift. I 1977 blei Sula eigen kommune. Handelslekkasjen til dei store kjøpesentra i nabokommunen Ålesund var stor, og avisa var derfor viktig for den lokale handelsstanden.

Sulaposten blei dei første tiåra stort sett driven av ein liten dugnadsgjeng, men dugnadsarbeidet blei etter kvart avløyst av faste tilsetjingar på slutten av 1970-talet.

I 1979 blei avisa eit aksjeselskap, etter at ho hadde vore eit personleg selskap for Slagsnes. Men han skaffa seg snart aksjemajoriteten i avisa, og i 1983 tok han fatt på sin siste periode som redaktør – fram til 1989, det året han fylte 84 år. Men også etter dette kunne han, gjennom aksjane sine, styre avisa. I 1990 fekk avisa pressestønad og i 1997 blei ho seld til Sunnmørsavisene AS.

Mediehuset Vårt Land overtok avisa i 1997, men selde fleirtalet av aksjane til Haramsnytt (seinare Nordre) i 2008.