Endeavour (romferge)

Endeavour blei bygd i 1987–1991 for NASA som erstatning for Challenger, som braut saman i den tragiske ulukka 28. januar 1986. Endeavour blei bygd av Rockwell International Space Transport Systems Division (no The Boeing Company) og levert til NASA i mai 1991. Under bygginga blei det brukt reservedelar som var laga til romferjene Discovery og Atlantis.

Den første tokta blei gjennomført 7.–16. mai 1992, då romferja innhenta Intelsat VI og  mannskapet gjorde service på satellitten og sette han i bane på nytt. I 1993 gjorde Endeavour service på Hubble-romteleskopet, og i 1998 hadde romferja samankopling med Mir og sørga for byte av Mir-mannskap.

I løpet av 19 års drift hadde Endeavour 12 dokkingar med Den internasjonale romstasjonen (ISS), den siste under finaletokta 16. mai til 1. juni 2011. Romferja gjorde 4671 omløp kring jorda. Under den siste samankoplinga med ISS blei Endeavour fotografert samankopla med ISS frå 200 meters avstand frå det russiske romfartøyet Sojus TMA-20. Endeavour er stilt ut ved California Science Center i Los Angeles, USA. 

Etter ein nasjonal konkurranse blant amerikanske grunnskular og vidaregåande skular fekk romferja namn etter det britiske skipet Endeavour, som hadde James Cook som kaptein på den første oppdagingsferda (1768–1771). Kommandoseksjonen i Apollo 15 hadde òg namnet Endeavour etter dette skipet.

• romferje
• romfart
• NASA