Faktaboks

Ingvard Havnen

Ingvard Martin Havnen

Fødd
26. juli 1951
Ingvard Havnen
Ingvard Havnen
Av /Nordisk råd 𝒲.
Lisens: CC BY 2.0

Ingvard Havnen er ein norsk statsvitar og ambassadør med mange års arbeid i utanrikstenesta og media.

Ingvard Havnen er fødd 26. juli 1951 i Rosendal i Hardanger. Han tok examen artium ved Stord gymnas i 1971 og hovudfag i statsvitskap ved Universitetet i Oslo i 1979. Etter avslutta aspirantkurs i Utanriksdepartementet i 1982 tenestegjorde han ved norske utanriksstasjonar i New York, Brussel og Washington. Frå 1992 til 2000 var han pressetalsmann i Utanriksdepartementet, i alt for fem utanriksministrar. Han var ekspedisjonssjef ved Statsministerens kontor i 2005–2012.

Den første ambassadørstillinga hadde han i Canada i 2000–2005. Frå 2012 til 2017 var han ambassadør i Danmark. I begge stillingane har han hatt nytte av hovudfagsoppgåva i statsvitskap, som handlar om konfliktkontroll i nordområda. Til liks med Noreg er både Canada og Danmark medlem av Arktisk råd, og Havnen meiner at klimaendringane forsterkar dei felles interessene landa har i nord.

I Danmark har òg norsk innanrikspolitikk stått på dagsordenen. I samband med Solberg-regjeringa sine planar om kommunesamanslåingar, tok Havnen imot talrike norske delegasjonar som kom til Danmark for å lære av den danske kommunereforma frå 2007.

Havnen var utanriksreporter i NRK i 1979–1980. Samtidig med diplomatkarrieren var han frilans skøytereporter for NRK i 1980–2000 og 2006–2007. I bijobbane fekk han utløp for ei skøyteinteresse som hang ved han frå han var gutunge på det vinterfattige Vestlandet.

Stillingar

Les meir i Store norske leksikon

Litteratur

  • «Biografi og CV for ambassadør Ingvard Havnen», norge.dk. [lesedato 12.10.2014]
  • Anna Bjørshol: «Ingvard Havnen – en atypisk ambassadør», norge.dk. [lesedato 4.2.2015]

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg