Stein Arve Ytterdahl er tidlegare ordførar i Farsund og tidlegare rådmann i Trondheim. I 2016 blei han den første i embetet som felles fylkesmann for Aust- og Vest-Agder og er sidan 2020 statsforvaltar i Agder.
Stein Arve Ytterdahl
Faktaboks
Stein Arve Ytterdahl
- Fødd
- 4. oktober 1951, Farsund, Agder
Bakgrunn
Stein Arve Ytterdahl er fødd i Farsund i Vest-Agder (no Agder). Han tok Farsund gymnas i 1967–1970 og er utdanna sivilingeniør frå NTNU (1971–1975), har studert pedagogikk, og har tatt leiarprogram ved The Wharton School i Pennsylvania i USA.
Karriere
Ytterdahl var forskar ved Norsk Hydro i Porsgrunn i 1977–1979, driftsleiar ved Hydro Karmøy i 1979–1985, seksjonssjef ved Lista Aluminiumsverk i 1985–1988 og administrerande direktør ved Sauda Smelteverk i 1988–1991. Han var personaldirektør i Statoil i 1991–1993 og deretter direktør for Statoil Tjeldbergodden i 1993–1996.
Deretter var han administrerande direktør ved Bredero Price i Farsund i 1996–1998 og direktør ved Handelshøyskolen BI i 1998–2000. Han gjekk tilbake til industrien som administrerande direktør ved Boliden Odda i 2000–2006. Han var direktør ved Bredalsholmen Dokk og Fartøyvernsenter i Kristiansand i 2011–2012.
Politisk karriere
Politisk var han aktiv i Arbeidernes Ungdomsfylking (AUF) medan han gjekk på vidaregåande skule og som politikar medan han var student. Han var ordførar i Farsund i 2007–2011 og kommunestyrerepresentant for Arbeidarpartiet og vararepresentant til fylkestinget i Vest-Agder i 2011–2012.
Frå 2012 til 2015 var Ytterdahl rådmann i Trondheim kommune, før han i 2016 blei utnemnd til fylkesmann i Aust- og Vest-Agder for ein periode på seks år. Etter at fylkesmannsembetet fekk kjønnsnøytralt namn i januar 2020 har han hatt tittelen statsforvaltar i Agder.
Ei av dei første oppgåvene til Ytterdahl som fylkesmann var arbeidet med kommunereforma. I Agder sa fyrst berre to av 30 kommunar ja til samanslåing, men Ytterdahl la fram forslag om fem kommunar.
Andre verv
Ytterdahl har hatt ei rekkje ulike verv, mellom anna som leiar av Studentsamskipnaden medan han var student. Han var medlem av det regjeringsoppnemnde ekspertutvalet om ny kommunelov frå 2013. Han var styremedlem Distriktssenteret frå 2014, styremedlem i Ungt Entreprenørskap Agder og styreleiar i Saycon og Ytterdahl AS.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.