Faktaboks

Tone Hansen
Fødd
1970, Kirkenes, Troms og Finnmark
Levetidskommentar
Oppvaksen i Klæbu, Trøndelag
Tone Hansen.
Tone Hansen.
Av /NTB.

Tone Hansen er kunstnar, kunstskribent og direktør ved Munchmuseet. Ho har tidligare vore leiar for Kulturrådet og direktør ved Henie Onstad Kunstsenter.

Liv og virke

Tone Hansen er fødd i Kirkenes og voks opp i Klæbu i Trøndelag. Ho studerte ved Statens kunstakademi frå 1994 til 1998 og seinare ved Konsthögskolan i Malmö.

I åra 2003 til 2008 var ho stipendiat ved Statens kunstakademi med prosjektet «Megamonstermuseum». Hansen var direktør ved Henie Onstad Kunstsenter i Bærum frå 2011 til 2022 var direktør, etter at ho frå 2008 hadde vore kurator der. I mai 2022 vart ho tilsett som direktør ved Munchmuseet.

I samband med stipendiatstillinga ved Statens Kunstakademi gav ho i 2007 ut boka Hvordan tenke museum i dag? Ho var òg redaktør for antologiane What does Public mean? Art as a Participant in the Public Arena (2006) og The New Administration of Aesthetics (2007). Som utøvande kunstnar er foto, video og tekst hennar media.

På Henie Onstad Kunstsenter har ho vore ansvarleg for ei rekkje nasjonale og internasjonale utstillingar, mellom anna med kunstnarane Håkon Bleken, Saskia Holmkvist og Hito Steyerl. Ho har vore redaktør/medredaktør for ei rekke bøker, dei fleste knytt til utstillinger på HOK.

Hansen er oppteken av kunsten sin plass i samfunnet. Som direktør ved Henie Onstad Kunstsenter peikte ho på at HOK ikkje er eit kunstmuseum, men eit kunstsenter der ny kunst blir produsert. Ho vil òg vere med på å leggje premissa for kulturlivet i framtida og leggje til rette for nye kunstnarlege uttrykk.

Hansen var med på å starte kunstmagasinet Frotté, var styreleiar i Unge Kunstneres Samfund (UKS) i 2003–2005 og var leiar for Kulturrådet i perioden 2016 til 2019.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg