Henrik Asheim er ein norsk politikar for Høgre som er stortingsrepresentant for Akershus sidan 2013 og første nestleiar i Høgre frå 2022. Han var forskings- og høgare utdanningsminister i 2020–2021. Han har òg vore leiar i Unge Høgre i 2008–2012 og leiar av finanskomiteen på Stortinget i 2018–2020.
Henrik Asheim
Faktaboks
Henrik Asheim
- Fødd
- 21. august 1983, Bærum
Bakgrunn
Henrik Asheim er fødd i Bærum i Akershus. Han fullførte allmennfagleg studieretning på Valler videregående skole i 2002. I 2012–2013 tok han fag i kommunikasjon og leiing ved Handelshøyskolen BI.
Politisk karriere
Asheim var leiar av Bærum Unge Høgre i 2003–2004, ungdomssekretær i Akershus Unge Høgre i 2003–2004, politisk rådgivar same staden i 2004–2005 og leiar i Akershus Unge Høgre i 2005–2006. I 2006 vart han nestleiar i Unge Høgres landsforbund, og frå 2008 til 2012 var han leiar i Unge Høgre etter Torbjørn Røe Isaksen. I perioden 2007–2011 var Asheim medlem av Bærum kommunestyre og Akershus fylkesting.
Han var vararepresentant til Stortinget frå 2009 til 2013, og frå 2013 er Asheim stortingsrepresentant for Akershus. Han var medlem av kyrkje-, utdannings- og forskingskomiteen i 2013–2017, og i perioden 2017–2021 satt Asheim i finanskomiteen. Frå 2018 til 2020 var han leiar av komiteen.
Frå 15. september til 26. november 2017 var Asheim konstituert kunnskapsminister og vikar for statsråd Torbjørn Røe Isaksen, som hadde foreldrepermisjon.
Då Framstegspartiet gjekk ut av regjeringa Solberg 24. januar 2020, kom Asheim tilbake i Kunnskapsdepartementet som minister for forsking og høgare utdanning, ei stilling han hadde fram til regjeringsskiftet oktober 2021.
Henrik Asheim var som leiar av Unge Høgre aktiv i debatten om sidemålsundervising. Han arbeidde for at flest mogleg kommunar skulle søkje om forsøk med valfritt sidemål, og han ville at Bondevik 2-regjeringa skulle avskaffe sidemålsundervisninga og eksamen i sidemål. Det fekk han ikkje gjennomslag for.
Andre verv
Frå 2012 til 2016 var Asheim leiar for styret i foreininga Sex og samfunn.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.