Atle Simonsen

Atle Simonsen er fødd i Sola kommune i Rogaland. Han tok vidaregåande skule i 2004–2007, var utvekslingselev ved Red Bluff Union High School i USA i 2005–2006 og har studert økonomi og administrasjon ved Universitetet i Stavanger.

13 år gamal blei Simonsen medlem av Framstegspartiets Ungdom (FpU), og han var leiar av Stavanger FpU i 2004–2005 og leiar av Rogaland FpU i 2006–2010. Simonsen var vararepresentant til sentralstyret i FpU i 2008–2012, medlem i sentralstyret i 2012–2014 og leiar av ungdomsorganisasjonen 2014–2016.

Simonsen har arbeidd som politisk rådgivar for bystyregruppa til Framstegspartiet i Stavanger. Han var kommunestyrerepresentant for Framstegspartiet i Stavanger i 2007-2015. I perioden 2011–2015 var han medlem av formannskapet og i perioden 2015–2019 var han varamedlem.

Simonsen var vararepresentant til Stortinget for Rogaland i 2009-2021. Han var politisk rådgivar i Helse- og omsorgsdepartementet 2016-2017 og i Barne- og likestillingsdepartementet i 2017. I 2017 og 2018 møtte han fast for Solveig Horne. I samband med regjeringsutvidinga 2018 kom Horne tilbake til Stortinget, medan Simonsen vart utnemnd til statssekretær i Kunnskapsdepartementet. Frå 2018 til 2020 var han statssekretær i Finansdepartementet.

Simonsen vil arbeide for lågare skattar og avgifter, samt færre forbod og påbod. Han ønskjer strengare straffer for kriminelle, vil arbeide for å endre eldreomsorga og vil at elevar i skulen skal få bestemme meir over kvardagen sin. Som FpU-leiar var han motstandar av norsk medlemskap i EU. I prosessen fram mot avgjersla om det skulle arrangerast OL i Oslo i 2022 var han ein stor motstandar.

• Framstegspartiet
• Framstegspartiets Ungdom
• Regjeringa Solberg
• statssekretær

• Stortinget: Atle Simonsen
• Regjeringen: Atle Simonsen