Ulf Kristersson er ein svensk konservativ politikar og siviløkonom, som frå 2022 er statsminister i Sverige. I 2017 vart han partileiar for høgrepartiet Moderaterna. Etter valet i 2022 fekk Kristersson i oppdrag å danne ei ny regjering i Sverige, som tiltredde 18. oktober 2022. Regjeringa er samansett av partia Moderaterna, Kristdemokraterna og Liberalerna, medan Sverigedemokraterna er støtteparti i Riksdagen.
Ulf Kristersson
Faktaboks
Ulf Kristersson
Ulf Hjalmar Kristersson
- Fødd
- 29. desember 1963, Lund, Sverige
Bakgrunn
Ulf Hjalmar Kristersson er fødd i Lund i Sverige og voks opp i Eskilstuna i Södermanland. Han er utdanna siviløkonom ved Uppsala Universitet. Frå 1988 til 1992 var Kristersson leiar for Moderaternas Ungdomsförbund, der han vart medlem som tenåring på St. Eskils gymnasium. Mellom 1995 og 1998 var han òg marknadssjef i den næringsliberale tankesmia Timbro.
Politisk karriere
Frå 1991 til 2000 representerte han Moderaterna i Riksdagen. Etter 2000 arbeidde Kristersson eit par år i det private næringslivet, før han gjekk tilbake til politikken i 2002, først som kommunalråd for finans i Strängnäs og frå 2006 som byråd for sosiale tenester i Stockholm. Frå 2010 til 2014 var han trygdeminister i regjeringa til Fredrik Reinfeldt.
Etter valet i 2014 gjekk Kristersson tilbake til Riksdagen og fekk posisjonen som nestleiar i finansutvalet og finanspolitisk talsperson for Moderaterna. I 2017 vart han vald til ny partileiar i Moderaterna etter Anna Kinberg Batra. Han var borgarleg statsministerkandidat ved riksdagsvalet i 2018, som enda med at regjeringa med Socialdemokraterna og Miljöpartiet vart sitjande med støtte frå dei borgarlege partia Centerpartiet og Liberalerna.
Moderaterna gjorde eit dårleg val i 2022 og vart Sveriges tredje største parti, forbigått av Sverigedemokraterna. Men det vart borgarleg fleirtal, og Kristersson fekk oppdraget med å danne ei ny regjering.
Partileiar
Som partileiar har Kristersson profilert seg på ein strengare politikk innanfor innvandring, integrering og justis, og han har kritisert den meir liberale politikken Moderaterna førte under Fredrik Reinfeldt. Han opna også for samarbeid med Sverigedemokraterna, som har henta mange veljarar frå Moderaterna. I samband med regjeringsforhandlingane 2022 fekk Sverigedemokraterna innflytelse og posisjonar i Riksdagen, sjølv om dei ikkje fekk plass i regjeringa.
Kristersson har definert seg som liberalist med konservative innslag og går inn for ein «verdibasert pragmatisme» som søkjer praktiske løysingar og samarbeid med utgangspunkt i dei verdiane partiet står for.
Utgjevingar
Kristersson har gitt ut fleire debattbøker, mellom dei Klyftan mellan väljare och valda (1988), Non-working generation (1994) og Trygghet och välfärd i en ny ekonomi (2000).
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.