Faktaboks

Lidvin Osland

Lidvin Magnus Osland

Fødd
7. januar 1937, Gaular (no Sunnfjord), Vestland

Lidvin Osland er geolog og tidlegare direktør i Norsk kulturråd og fylkeskultursjef. Han har utmerkt seg som ein særleg kreativ og engasjert byråkrat som har gått i brodden for ei rekkje nye tiltak innanfor kulturlivet, og som har utfordra grensene for folkevald styring.

Lidvin Osland er fødd i Gaular og er oppvaksen i Høyanger. Etter examen artium ved Firda Gymnas i 1957 utdanna han seg til cand.real. med geologi som hovudfag ved Universitetet i Bergen i 1967. Han arbeidde i 1970–1972 som statsgeolog, i 1972–1975 som museumslektor ved Universitetet i Tromsø, og i 1975–1979 som leiar ved Tromsø Museum. Den fremste rolla har Osland likevel spela som kulturbyråkrat, som fylkeskultursjef i Sogn og Fjordane 1978–1993 og 1996–2004, og som direktør i Norsk kulturråd 1993–1996. Frå 2004 til 2007 var han spesialrådgivar i fylkeskommunen, mellom anna med oppgåver knytte til internasjonalisering og reiselivssatsingar. Han har hatt fleire verv knytte til dette feltet, mellom anna som nestleiar i Nordisk samarbeidsgruppe for kultur og helse og som medlem i Utanriksdepartementet og Handelsdepartementet sitt kultureksportutval.

I si tid i Kulturrådet arbeidde han særleg for å få til ei kopling mellom kultur, næring og reiseliv.

Mange av kulturinstitusjonane i Sogn og Fjordane vart etablerte i Osland si tid som fylkeskultursjef, med han som fødselshjelpar, mellom anna Fylkesgalleriet, Førde Internasjonale Folkemusikkfestival, distriktsmusikarordninga, teaterbåten «Innvik» og Nordisk kunstnarsenter.

Osland har hatt ei rekkje sentrale tillitsverv i norsk kulturliv, mellom annan som styreleiar for Rikskonsertane, Statens museumsråd, Norsk kulturskuleråd, Norges Husflidslag og det norske styret for International Councils of Museums.

I 2006 fekk Osland tildelt Kongens fortenestemedalje i gull.

Les meir i Store norske leksikon

Litteratur

  • Trond Ueland og Georg Arnestad (red.): Lidvin – rett og slett. Førde 2007

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg