Toril Marie Øie er jurist og høgsterettsdomar som i 2016 blei utnemnd til høgsterettsjustitiarius i Noreg. Øie er den første kvinna som har dette embetet, og er med dette embetet den fjerde høgast rangerte personen i Noreg – etter kongen, stortingspresidenten og statsministeren.
Toril Marie Øie
Faktaboks
Toril Marie Øie
- Fødd
- 17. juli 1960, Oslo
Toril Marie Øie tok i 2016 over jobben som justitiarius i Høyesterett. Bildet er fra en straffesak i Høyesterett i 2013.
Bakgrunn
Toril Marie Øie er fødd i Oslo. Ho tok vidaregåande skule i 1976–1979 og juridisk embetseksamen ved Universitetet i Oslo i 1986, der ho skreiv særavhandling om skattelegging av ugifte sambuarar samanlikna med ektepar.
Karrieren
Øie arbeidde som førstekonsulent i lovavdelinga i Justisdepartementet i 1986–1988, som lovrådgivar i 1990–2000 og som avdelingsdirektør i 2000–2004 ved lovavdelinga i Justisdepartementet. I 1988–1990 arbeidde ho ved Strømmen som dommarfullmektig, konstituert dommar og sorenskrivar. Øie underviste i tillegg som førstelektor II ved det juridiske fakultetet ved Universitetet i Oslo i 1994–2002. Ho var domar i Høgsterett i 2004–2016 og tok til i stillinga som høgsterettsjustitiarius i mars 2016.
Høgsterett er den øvste domstolen i Noreg og har til saman 20 domarar. Toril Øie leier domstolen fagleg og administrativt, er med og behandlar saker på same måten som dei andre domarane og representerer Høgsterett i det offentlege rommet.
I 2018 vart Øie utnemnd til Kommandør med stjerne av St. Olavs Orden.
Utgjevingar
Øie har skrive fagartiklar og lærebøker og har halde foredrag og førelesingar. I 1985 kom boka Beskatning av samboere. En sammenligning med reglene om beskatning av ektefeller. I 1997 gav ho ut Forbrytelse og straff. Lærebok i strafferett, samt Forbrytelse og straff. Bind 1: Innføring i strafferett i 2001, saman med Svein Slettan. I bøkene Tvisteloven. Kommentarutgave bind I og II (2013) var ho medforfattar mellom anna saman med tidlegare høgsterettsjustitiarius Tore Schei.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.