Faktaboks

Anniken Hauglie
Fødd
10. september 1972, Oslo
Anniken Hauglie
Anniken Hauglie etter utnevningen til arbeids- og sosialminister i ekstraordinært statsråd på Slottet onsdag 16. desember 2015.
Anniken Hauglie
Av /NTB scanpix.

Anniken Hauglie er ein norsk politikar for Høgre som tidlegare har vore byråd for kunnskap og utdanning i Oslo. Ho var arbeids- og sosialminister i regjeringa Solberg frå desember 2015 til januar 2020. Frå 2021 er ho viseadministrerande direktør i NHO.

Bakgrunn

Anniken Hauglie er fødd i Oslo og voks opp i Ski (no Nordre Follo) i Akershus. Ho var elev ved Kontra videregående skole i 1989–1991 og er utdanna cand.polit. med hovudfag i sosiologi frå Universitetet i Oslo i 2000. Hauglie har mellomfag i statsvitskap og grunnfag i livssyn og etikk, og ho studerte prosjektleiing ved BI i 2006. Ho er gift med Høgre-politikar Lars Jacob Hiim.

Politisk karriere

Hauglie har arbeidd som politisk rådgivar for Akershus Høgre, var sosialpolitisk rådgivar for stortingsgruppa til Høgre i 2001–2003 og politisk rådgivar for sosialminister Ingjerd Schou i Bondevik 2-regjeringa i 2003–2005. I 2005–2006 var ho rådgivar i Forbrukarrådet, og ho var kommunalpolitisk rådgivar for stortingsgruppa til Høgre fram til 2010.

Byråd i Oslo

Frå 2010 til 2015 var Anniken Hauglie byråd i Oslo. I 2010–2013 var ho byråd for sosiale tenester og i 2013–2015 byråd for kunnskap og utdanning.

Statsråd

16. desember 2015 vart Anniken Hauglie utnemnd til arbeids- og sosialminister i regjeringa Solberg, som etterfølgjer for Robert Eriksson frå Framstegspartiet. Ho sat i denne statsrådsposten fram til endringane i regjeringa i januar 2020.

NAV-skandalen

Som statsråd var Hauglie ansvarleg for gjennomføringa av pensjonsreforma, og ho hadde òg ansvaret for NAV i perioden då det i 2019 vart kjent at ei rekkje brukarar av NAV feilaktig hadde vorte idømt straff, fleire av dei fengselsstraff, for misbruk av ulike ytingar. Skandalen rundt den feilaktige forståinga av EØS-regelverket førte til stort politisk press på Hauglie frå opposisjonen på Stortinget, og det var varsla mistillitsforslag mot henne då ho gjekk ut av regjeringa.

Hauglie var medlem av DSK/Minerva i 1990-åra, og i 2012–2013 var ho medlem av programkomiteen i Høgre. Frå 2020 til 2021 var Hauglie administrerande direktør i Norsk olje og gass før ho kom til NHO.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg