Magnhild Hagelia

Magnhild Hagelia var fødd i Gjerstad i Agder. Ho var elev ved Otto Treiders handelsskole i Oslo i 1933–1934 og tok òg revisorkurs i 1934. Ho var forretningsførar i Gjerstad forsyningsnemnd i 1939–1945, kommunerevisor i Gjerstad i 1945–1947 og tilsett i fylkesrevisjonen i Aust-Agder frå 1948 til ho gjekk av med pensjon i 1969.

Hagelia var ein pioner i spørsmål som galdt kvinnene si stilling i samfunnet. Ho var overtydd om at kvinner måtte ta aktivt del der dei politiske diskusjonane gjekk føre seg. Det galdt alle politiske saker, ikkje berre dei typiske kvinnepolitiske sakene den gongen, som var skule- og sosialsaker. Ho engasjerte seg i fagforeiningsarbeid og i partipolitisk arbeid. I 1945 blei ho vald inn som kommunestyrerepresentant i Gjerstad, men flytta frå kommunen rett etter valet. Ho var seinare kommunestyrerepresentant i Fjære i 1947–1951 og 1968–1970, i Øyestad 1956–1959 og i Grimstad i 1971–1972.

Hagelia blei vald som vararepresentant til Stortinget frå Aust-Agder i 1945 og var fast representant i fire periodar, fram til 1965. Ho blei vald til visepresident i Lagtinget i oktober 1961 og var den første kvinna som leidde eit stortingsmøte frå presidentplassen, 9. februar 1962.

Hagelia blei utnemnd til riddar av 1. klasse av St. Olavs Orden i 1976 og blei heidra med ein byste ved Grimstad rådhus på 90-årsdagen i 1994, laga av Arne Vinje Gunnerud.

• Magnhild Hagelia i Norsk biografisk leksikon
• Arbeidarpartiet
• kvinners rettar i Noreg frå 1945 til 1990-åra
• revisjon
• Lagtinget
• Odelstinget

• Stortinget: Biografi om Magnhild Hagelia

• Odd Sættem (red.): Hvem er Hvem? Oslo 1984
• Trond Nordby (red.): Storting og regjering 1945–1985. Institusjoner – rekruttering. Oslo 1985