Faktaboks

Helga Pedersen
Fødd
13. januar 1973, Sør-Varanger, Finnmark
Helga Pedersen.
Stortinget.
Helga Pedersen på ekstraordinært landsmøte 14. juni 2014, flankert av partisekretær Raymond Johansen og partileiar Jonas Gahr Støre. Foto: Johannes Dalen Giske. Tilgjengeleg på CC BY-ND 2.0.
.
Lisens: Avgrensa gjenbruk

Helga Pedersen er ein norsk politikar for Arbeidarpartiet som var nestleiar i partiet 2007–2015 og stortingsrepresentant frå Finnmark 2009–2017.

Bakgrunn

Helga Pedersen er fødd i Sør-Varanger i Finnmark og voks opp i Tana. Ho gjekk på Vadsø videregående skole 1988–1989 og Lycée Alain Chartier i Bayeux i Frankrike 1989–1992. Ho blei cand.mag. med mellomfag i russisk ved Universitetet i Bergen 1993–1996 og tok mellomfag i historie ved Universitetet i Tromsø 1996–1998.

Pedersen var lærar og assistent ved Boftsa skole 1992–1993, førstekonsulent i utbyggingsetaten i Finnmark fylkeskommune 1998–2000, prosjektmedarbeidar i GRID-Arendal 2001–2002 og prosjektleiar i Tanafjordprosjektet 2002–2003.

Ho er sjøsame, og språket hennar er nordsamisk. Ho var den første statsråden med samisk bakgrunn i Noreg og den første same i partileiinga i Arbeidarpartiet.

Politisk karriere

Pedersen var leiar av Tana AUF 1992–1993 og i Tana Arbeiderparti frå 2002. Ho var leiar i Arbeidarpartiets samepolitiske råd 2000–2002. Pedersen var varamedlem av fylkestinget i Finnmark 1999–2003 og fylkesordførar i Finnmark 2003–2005.

Stortinget og regjering

Pedersen var personleg rådgivar i Nærings- og handelsdepartementet i 2001 for statsråd Grete Knudsen. Frå 2007 til 2015 var ho nestleiar i Arbeidarpartiet. Frå 2009 til 2017 var ho stortingsrepresentant frå Finnmark ogparlamentarisk leiar frå 2009 til 2013. Ho var nestleiar i Kommunal- og forvaltningskomiteenStortinget i perioden 2013–2017. Ho var statsråd i regjeringa Stoltenberg II i Fiskeri- og kystdepartementet 2005–2009.

Sametinget

Pedersen vart i 2016 valt til Arbeidarpartiets sametingspresidentkandidat for Sametingsvalet 2017, men trekte seg same år på grunn av konfliktar med Arbeidarpartiets Sametingsgruppe. Ho stilte ikkje til attval til Stortinget i 2017 og flytta tilbake til heimkommunen Tana. Frå 2019 er ho ordførar i Tana.

Utmerkingar

Pedersen blei æresborgar i fiskeværet Sørvær i Finnmark i 2008, fekk prisen Årets havfrue i 2008 av Kongelig Norsk Båtforbund og fekk WWF sin globale pris Leaders for a Living Planet i 2009.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg