Inga Marte Thorkildsen er tidlegare nestleiar i Sosialistisk Venstreparti (SV), tidlegare byråd for oppvekst og kunnskap i Oslo i 2015–2021, og tidlegare barne–, likestillings– og inkluderingsminister i regjeringa Stoltenberg II.
Inga Marte Thorkildsen
Faktaboks
- Fødd
- 2. juli 1976, Oslo
Bakgrunn
Inga Marte Thorkildsen er fødd i Oslo. Ho tok examen artium ved Tønsberg gymnas i 1995 og cand.mag.-graden i 2000, med faga religionshistorie og statsvitskap. Thorkildsen arbeidde mellom anna som frilansjournalist, i vikarbyrå og i bompengeselskap i studietida.
Politisk karriere
Thorkildsen var fylkessekretær i Vestfold Sosialistisk Ungdom og Sosialistisk Venstreparti i 1994–1996. Ho var medlem av sentralstyret i Sosialistisk Ungdom i 1996–2000, kvinnepolitisk leiar i Sosialistisk Venstreparti i 2002–2003 og nestleiar i partiet i 2012–2015.
Ho var vald som stortingsrepresentant for Sosialistisk Venstreparti frå Vestfold frå 2001 til 2013. Thorkildsen var medlem av justiskomiteen på Stortinget i si fyrste stortingsperiode i 2001–2005. I perioden 2005–2009 var ho fyrst medlem helse– og omsorgskomiteen i 2005–2007, deretter medlem av energi– og miljøkomiteen i 2007–2009. I 2009 sat ho i finanskomiteen og i valkomiteen på Stortinget. Thorkildsen har vore finanspolitisk talskvinne og parlamentarisk nestleiar på Stortinget for Sosialistisk Venstreparti.
I perioden 2012–2013 var Thorkildsen statsråd i barne–, likestillings– og inkluderingsdepartementet i regjeringa Stoltenberg II. Ho tok over som statsråd etter partileiar Audun Lysbakken då han måtte trekke seg frå stillinga. Som statsråd hadde ho ansvar for politikken knytt til likestilling, oppvekstvilkår og forbrukarrettar. Ved stortingsvalet i 2013 mista Thorkildsen plassen på Stortinget.
Frå 2015 til 2021 var ho medlem av byrådet i Oslo, først som byråd for eldre, helse og sosiale tenester i 2015–2017, deretter som byråd for oppvekst og kunnskap i 2017–2021. Thorkildsen har særleg engasjert seg i saker om barn sine rettar, barnehagar, feminisme og kvinnemishandling, samt innvandring og fordeling av godar i samfunnet.
Anna engasjement, andre verv og utmerkingar
Thorkildsen var aktiv i SOS Rasisme og Natur og Ungdom i 1990–åra og var medlem av styret for Ny Tid i 1998–2000. I 2012 fekk ho Humleprisen (tildelt av Foreningen mot seksuelle overgrep, FMSO). Etter tida på Stortinget arbeidde ho ein periode for kompetansenettverket BarnsBeste og var spesialrådgjevar for den ideelle stiftinga Forandringsfabrikken 2014–2016. I 2015 gav ho ut boka Du ser det ikke før du tror det. Et kampskrift for barns rettigheter.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.