Faktaboks

Søren Nordeide

Søren Andreas Nordeide

Fødd
4. februar 1872, Askvoll, Vestland
Død
11. august 1941, Trondheim, Trøndelag

Søren Nordeide var rektor og professor i pedagogikk. Han skreiv tidleg på nynorsk om pedagogikk og psykologi.

Bakgrunn

Søren Andreas Nordeide var fødd i Askvoll i Sogn og Fjordane (no Vestland) og døydde i Trondheim i Sør-Trøndelag (no Trøndelag). Han tok lærareksamen på Stord i 1894, artium i Bergen i 1899 og andreeksamen, førebuande prøve, ved Universitetet i Kristiania i 1900.

Pedagogikk og psykologi

I 1902 vart han tilsett ved Volda lærarskule, seinare ved lærarskulen i Levanger, der han vart overlærar i 1913. I 1922 vart han professor i pedagogikk og rektor ved Noregs Lærarhøgskule (no NTNU) i Trondheim.

Saman med Erling Kristvik skreiv han i 1913 Lærebok i sjælelæra, i 1916 gav han ut Soga um uppseding og skule, som kom i nye, reviderte utgåver heilt til 1966, og i 1919 kom boka Fraa barn til vaksen. I 1921 følgde Læraren og lærararbeidet og i 1931 I heim og skule. Bøkene var skrivne til bruk i lærarutdanninga.

Han skreiv òg fleire akademiske og populærvitskaplege utgreiingar. I 1928 gav han ut Det sjelelege sanningstilstand. Ei psykologisk utgreiing og i 1934 Den menneskelege personlegdom. Ei psykologisk-pedagogisk utgreiing. Den siste større utgreiinga var Nyare synsmåtar i psykologi frå 1937. Han var oppteken av barnepsykologi, særleg pedagogisk psykologi, var interessert i eksperimentalpsykologi og var skeptisk til psykoanalysen.

Anna engasjement og utmerkingar

Nordeide fekk i 1913 professor Monrads gullmedalje for ei psykologisk avhandling om rompersepsjon, Rumproblemet i den nyere psykologi. Han var på studiereiser til England og Tyskland og var medlem av Det Kongelige Norske Videnskabers Selskab i Trondheim frå 1926.

Les meir i Store norske leksikon

Litteratur

  • Anders Kirkhusmo: «Akademi og seminar». Norges lærerhøgskole 1922–1982. Trondheim 1983
  • Hans Midbøe: Det Kongelige Norske Videnskabers Selskabs historie 1760–1960. Trondheim 1960
  • Søren Nordeide: Det sjelelege sanningstilstand. Ei psykologisk utgreiing. Oslo 1928
  • Søren Nordeide: Den menneskelege personlegdom. Ei psykologisk-pedagogisk utgreiing. Oslo 1934
  • Søren Nordeide: Nyare synsmåtar i psykologi. Oslo 1937
  • Søren Nordeide: Soga om oppseding og skule, fjerde opplag. Oslo 1939

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg