Nynorsk kulturhistorie

21.8.1841 prentar Bergens Stiftstidende «Selvbiografi» av Ivar Aasen som ein del av biskop Jacob Neumanns artikkel «Ivar Aasen». Dette er det første stykket av Ivar Aasen i ei avis

21.8.1926 kjem første nummeret av Sogns Avis ut i Vik i Sogn med Thormod Liljedahl som redaktør. Siste nummeret kjem 1.11.1954. 

21.8.1933 annonserer Noregs Boklag i Den 17de Mai at Tysk-norsk ordbok av J.Fr. Voss no er i sal. Initiativet til dette verket tok Sigurd Blehr og J. F. Voss som studentar i 1908. Dette er den første store ordboka frå tysk til nynorsk.

21.8.1943 debuterer Aslaug Låstad Lygre med diktsamlinga No blømer alle rosene på Gyldendal Norsk Forlag. 

21.8.1978 går Stavangerensemblet med vokalisten Frode Rønli på scena under ein solidaritetskonsert på tiårsdagen for den sovjetrussiske invasjonen i Tsjekkoslovakia. Grpppa vil lage ei stavangersk form for norsk rock, seier dei i intervju med Rogalands Avis 2. september. Der kjem det fram at gruppa blei stifta året før. Første singelplata blir lansert 16. desember. med «Vidunderlige nye Stavanger» og «Kan‘kje finna fingen», begge skrivne av Svein Tang Wa. 

21.8.2003 kunngjer Kultur- og kyrkjedepartementet at Sylfest Lomheim er tilsett som direktør i det nye kompetansesenteret som i 2005 skal avløyse Norsk språkråd. Lomheim tek til i stillinga 1.1.2004 (sjå 20.4.1970, 1.2.1972).

21.8.2009 lanserer omsetjingsprogrammet Apertium maskinomsetjing mellom bokmål og nynorsk. Apertium er eit open kjelde-program som sidan 2004 er blitt utvikla ved Universitetet i Alicante i samarbeid med språk- og IKT-miljø i fleire land.