Hopp til innhold
Ottar Grepstad

Nynorsk kulturhistorie

19.3.1926 kjem første nummeret av Ørsta Avis ut i Ørsta med Sigurd Bergmann som redaktør. Avisa er eit framhald av Sunnmøre (sjå 3.10.1921). Siste nummeret kjem 11.1.1941. 

19.3.1991 presenterer Bjørn Seljebotn i Nynodata første versjonen av dataprogrammet Nyno for datamaskinell omsetjing frå bokmål til nynorsk. Det gjer han for første klasse ved Porsgrunn vidaregåande skule.

All verdas språk

19. mars 1962 gir Columbia Records ut debutplata Bob Dylan med Bob Dylan.

Han har sidan februar 1961 spela på klubbar i Greenwich Village i New York, men plata slår ikkje med det same. Det første året sel plateselskapet 5000 eksemplar. Dei fleste av dei 13 songane på plata er tradisjonssongar i Dylans eigne arrangement.

Med på plata er også «Song to Woody», ei hylling av det store førebiletet Woody Guthrie. Denne songartisten og politiske aktivisten har i lang tid samla inn amerikansk tradisjonsmusikk og sjølv skrive mange songar. Blant dei er «This Land is Your Land» frå 1940, som er eit kritisk svar til «God Bless America» av Irving Berlin.

Same året møter Guthrie ein annan tradisjonssamlar, den radikale Pete Seeger. Desse to fornyarane av amerikansk tradisjonsmusikk er nødvendige føresetnader for dei opningane Bob Dylan i 1960-åra skaper for moderne vestleg visesong og rock.

I 2016 får Bob Dylan Nobels litteraturpris «for having created new poetic expressions within the great American song tradition».

Sist oppdatert: 11.03.2020