Hopp til innhold

Eit språk blir til: 1961

22.4. prentar Aftenposten i veketillegget sitt det ukjende diktet «Voni» av Ivar Aasen. Han har datert diktet 12.6.1891 og har skrive det som helsing i ei minnebok for Ingeborg Alsaker-Nøstdahl, f. Digernes i Ørsta (sjå 2009).

2.6. kjem første nummeret av Strilen ut på Isdalstø med Mons J. Risa som redaktør.

3.8. blir Noregs Elev- og Studentmållag skipa med Eirik Aksel Larsen som første formann. Organisasjonen skiftar namn til Norsk Målungdom i 1972.

27.10. er datoen for eit enkelt prøvenummeret i A4-format av den nye avisa Dag og Tid som Magne Rommetveit formar på skrivemaskin (sjå 1962).

30.10. gir Det Norske Samlaget ut Tom Duley og andre viser, gjendikta og redigert av Hartvig Kiran. Denne samlinga av omsetjingar av amerikanske viser blir svært viktig for dei visemiljøa som dukkar opp i Oslo og kring studentrevyar seinare i 1960-åra, og fornorskar visetradisjonen (sjå 1971).

7.11. debuterer Ragnar Ulstein med romanen Harpegjengen på Det Norske Samlaget. Den er den første nyskrivne romanen forlaget gir ut. 



Sist oppdatert: 06.08.2020