Hopp til innhold

Eit språk blir til: 1945

7.6.1945 kjem første nummeret av Telemark Tidend ut i Skien med Aslak Berdal som redaktør. Siste nummeret kjem 11.3.1956, og frå då av er avisa bilag i avisa Varden.

1.10. lanserer Norsk Barneblads Forlag det første Tuss og Troll-juleheftet, fortalt av Øivind Dybvad og teikna av Jens R. Nilssen. Med unntak av 1947 har heftet sidan kome kvart år. Til no er vel 200 norske eventyr og segner utgitt i teikneserieform på denne måten.

2.10. debuterer Alf Prøysen med forteljingane Dørstokken heme på dialekt på Høvik bokhandels forlag (sjå 1938).

7.11. debuterer Olav Dalgard med diktsamlinga Gjennom mørkret på Noregs Boklag.

14.12. debuterer Einar Skjæraasen med diktsamlinga Så stiger sevjene på dialekt på H. Aschehoug & Co. Han debuterte på bokmål i 1936.

I desember debuterer Trygve Bjerkrheim med diktsamlinga Landet og lyset på Gry Forlag.

Hans Eidnes debuterer med diktsamlinga Fredsvår på F. Bruns bokhandels forlag. 

Pål Sundvor debuterer med barneboka Ola frå garden på Fonna Forlag. I Oria er boka registrert med førsteutgåve i 1947, men i mellom anna Norsk Tidend 31.10.1945 er boka nemnd som utgitt. 


Sist oppdatert: 05.08.2020