Hopp til innhold

Eit språk blir til: 1946

3.1. kjem første nummeret av Dølabladet ut på Otta med Andres By som redaktør. Avisa er eit framhald av Dølenes Blad og skiftar no både namn og redaksjonsspråk. Siste nummeret kjem 28.2.1950.

14.2. kjem første nummeret av Sykkylvsbladet ut i Sykkylven med Johan Drabløs og Øystein Eliassen som redaktørar.

16.2. kjem første nummeret av Songa ut i Lunde med S. Liestøl som redaktør. Siste nummeret kjem 30.6.1950. Avisa held fram som Ulefoss Avis.

8.3. kjem første nummeret av Haus Bygdeblad ut på Haus med Johs. Revheim som redaktør. Siste nummeret kjem 27.2.1953. Avisa held fram som Sambygdingen (sjå 1953).

7.7. held kronprins Olav på ny stemnetale for Noregs Ungdomslag på Stiklestad på nynorsk (sjå 1930).

4.8. opnar riksprogramsjef Olav Midttun den nye museumsbygningen i Aasen-tunet (sjå 193819391940).

4.10. kjem første nummeret av Sulaposten ut i Langevåg med Tor Bergmann og Ansgar Slagnes som redaktørar.

25.10. debuterer Ragna Rusten under pseudonymet Svåva med novellesamlinga Doggfall på Noregs Boklag.

21.11. debuterer Marius Hagbart Evjeberg med Sketsjar for ungdomslag på Marius Evjebergs forlag på Bøstad.

21.11. blir Venner av Det Norske Teatret skipa med Lars Reinton som første formannen.

26.11. debuterer Sverre By med barneboka På livet laust på Globusforlaget i Trondheim. 

20.12. får Olav H. Hauge i hende debutboka Glør i oska frå Noregs Boklag. «Eg las korrektur på boki på Valen», skriv han i dagboka same dagen. 

Marius Evjeberg skipar Marius Evjebergs Forlag.


Sist oppdatert: 05.08.2020