Hopp til innhold

Eit språk blir til: 1965

13.2. blir den norske finalen i Melodi Grand Prix avvikla med fem songar. For første gong er ein av songane på nynorsk. «Jenteord» er skriven av Kristian Hauger (melodi) og Lasse Beitan (tekst) og blir framført av både Per Asplin og Ivar Medaas. «Karusell» av Jolly Kramer-Johansen vinn, og «Jenteord» kjem på fjerdeplass. 

15.2. får Tarjei Vesaas Nordisk Råds litteraturpris for romanen Isslottet, utgitt på Gyldendal Norsk Forlag (sjå 1978 og 2015).

I mai lanserer Den norske Bokklubben si første nynorske hovudbok, Kimen av Tarjei Vesaas.

11.10. blir Ivar Aasen-sambandet skipa i Bergen med Per Thorson som første formann.

2.12. kjem første nummeret av Sogn Dagblad ut i Høyanger med Per Dingsøyr som redaktør. Avisa er eit framhald av Sogn Folkeblad. Siste nummeret kjem 3.5.1997.

Stavanger-gruppa Swing Blues spelar inn Beatles-songen ”She loves you” med nynorsk tekst: ”Ho elskar deg”, gjendikta av Lars Chr. Sande.


Sist oppdatert: 06.08.2020