Tenestemål var eit omgrep som vart nytta i mållova om hovudmålforma til eit lokalt eller regionalt statsorgan. Tenestemålet skulle nyttast i rundskriv, kunngjeringar og informasjonsmateriell som desse statsorgana lagde. Reglane var fastsette i lov om målbruk i offentleg teneste (mållova) og i forskrifta til lova.

Faktaboks

Også kjend som

bokmål tjenestemål

Etter mållova § 5 kunne ein kommune gjere vedtak om å krevje bokmål eller nynorsk i skriv frå staten. Tenestemålet til eit lokalt statsorgan var den målforma vertskommunen hadde gjort vedtak om etter § 5 i lova. Var vertskommunen språkleg nøytral, var også det lokale statsorganet språkleg nøytralt.

Tenestemålet til eit regionalt statsorgan var fleirtalsmålforma i tenestekrinsen til statsorganet. Var det inga fleirtalsmålform i tenestekrinsen, var det regionale statsorganet språkleg nøytralt. Reglar for utrekning av fleirtalsmålform fanst i mållova § 7. Til grunn låg målvedtaka i kommunane.

Av 428 kommunar (2015) hadde 158 kommunar kravd bokmål og 113 nynorsk i skriv frå staten. 157 var språkleg nøytrale. Nynorsk var fleirtalsmålform i fire fylke: Rogaland, Hordaland, Sogn og Fjordane og Møre og Romsdal. Bokmål var fleirtalsmålform i ni fylke. Seks fylke hadde ikkje fleirtalsmålform og var språkleg nøytrale: Oslo, Telemark, Aust-Agder, Sør-Trøndelag, Nord-Trøndelag og Troms.

«Tenestemål» blir stundom forveksla med nemninga «administrasjonsmål». Administrasjonsmål er den målforma ein kommune eller fylkeskommune vedtek å bruke i sin eigen administrasjon. Det er oftast, men ikkje alltid, samsvar mellom administrasjonsmålet og den målforma kommunen har gjort vedtak om etter § 5 i mållova. Vedtak om kommunalt administrasjonsmål er ikkje vedtak etter mållova.

Les meir i Store norske leksikon

Litteratur

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg