Faktaboks

Olaf Almenningen
Fødd
29. januar 1947, Voss, Vestland
Olaf Almenningen
Olaf Almenningen
Av .

Olaf Almenningen er ordboksredaktør og målmann. Han har skrive eller redigert fleire bøker om norskdomsrørsla.

Olaf Almenningen er fødd på Voss. Han tok examen artium ved Voss landsgymnas i 1966 og vart i 1982 cand.philol. med faga norsk, engelsk, historie og samfunnskunnskap. Hovudoppgåva hans, Målstrev og målvokster, handlar om framveksten av målrørsla i tida 1905 til 1913 og vart utgitt av Det Norske Samlaget i 1984.

I studietida var han aktiv i Studentmållaget i Bergen, der han var redaktør for medlemsbladet «Vestlandsfa’n» i 1969–1970. Han var nestleiar i Norsk Målungdom i 1972–1973 og var skrivar i Noregs Mållag frå 1976 til 1987. Frå 1987 til 2016 var han redaktør i Norsk Ordbok 2014.

Almenningen er ein stor kjennar av målreisingssoga og har gjort seg nytte av denne kunnskapen i fleire bøker, mellom anna den viktige Striden for nynorsk bruksmål, som han gav ut saman med Åsmund Lien i 1978. I tida som skrivar i Noregs Mållag var han uvanleg profilert som offentleg debattant. Han var òg tidleg med på å samle inn store mengder data om skulemålsrøystingar.

Han har skrive eller redigert jubileumsbøker om Noregs Mållag, Bondeungdomslaget i Oslo (BUL) og Studentmållaget i Oslo, og han har skrive lærebøker i nynorsk.

Almenningen var leiar for Idrottslaget til BUL i Oslo i 1997–1999. Han var i fleire år med i styret for Riksfondet for nynorsk presse (no Stiftinga Vener av Dag og Tid). I 2018 vart han heidersmedlem i Noregs Mållag.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg