Faktaboks

Gerhard Garatun-Tjeldstø
Fødd
19. juli 1901, Herdla i Askøy, Vestland
Død
9. oktober 1995, Bergen, Vestland

Gerhard Garatun-Tjeldstø var ein norsk journalist og forfattar. Han fekk læretida si i Gula Tidend, arbeidde i 25 år i Bergens Tidende som fiskerimedarbeidar og teatermeldar. Han skreiv særleg skodespel om menneske ved havet.

Bakgrunn

Gerhard Garatun-Tjeldstø var fødd i Herdla (no Askøy) i noverande Vestland og døydde i Bergen i Hordaland (no Vestland). Han tok lærareksamen på Stord i 1921, var lærar i Hjelme i Nordhordland i 1921–1927 og gjekk så over til journalistikk og forfattarverksemd.

Målsak, journalistikk og forfattarskap

Frå 1926 til 1937 arbeidde han i målrørsle-avisa Gula Tidend, og i 1937 vart han tilsett i Bergens Tidende, der han vart verande til han gjekk av med pensjon i 1971. Frå 1946 til 1965 var han fiskerimedarbeidar i avisa, frå 1965 teatermeldar.

Han var vestmann (sjå målmann) og skreiv i-mål, som òg var husnorma i Bergens Tidende for redaksjonelt stoff på nynorsk. Norma vart endra først etter at Garatun-Tjeldstø slutta i avisa.

Garatun-Tjeldstø skreiv skodespela Vokenatt (framført på Det Norske Teatret i 1933, på Den Nationale Scene i 1934), Og vegine falle so vide (framført på Det Norske Teatret i 1954, på Den Nationale Scene i 1957) og Krosshaugen (framført på Den Nationale Scene i 1965). Dei tre teaterstykka vart i 1965 samla i boka Menneske ved havet. Han skreiv òg høyrespel for radioen og jubileumsskriftet Noregs sildesalslag gjennom 50 år (1977).

Les meir i Store norske leksikon

Litteratur

  • Kåre Fasting: Hundre års kavalkade. Bergens Tidende 1868–1968. Bergen 1967
  • Gerhard Garatun-Tjeldstø: Menneske ved havet. Oslo 1965
  • Ottar Grepstad: Avisene som utvida Noreg. Oslo 2010
  • Per Håland (red.): Gula Tidend i 75 år. Bergen 1979
  • Norsk Presseforbund: Pressefolk 1990. Institutt for Journalistikk 1990
  • Nils Sletbak (red.): Det Norske Teatret 50 år. 1913–63. Oslo 1963

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg