Faktaboks

Geirr Lystrup
Fødd
22. mars 1949, Vinje, Vestfold og Telemark
Verke
Songer, musikar, forfattar
Familie

Foreldre: Prest og kunstmålar Sigmund Lystrup (1909–2006) og husmor Gina Lystrup (1922–2017).

Gift 1975 med tannlege og akupunktør Siri Thesen (29.5.1950–), dotter av lektor Olaf Thesen (1918–) og husmor Synnøve Viksmoen (1923–).

Svoger til Erik Hillestad (1951–).

Geirr Lystrup
.
Lisens: Avgrensa gjenbruk

Geirr Lystrup er ein norsk visesongar og forfattar. Han er ein allsidig trubadur som har medverka til å fornye den norske visetradisjonen. Lystrup syng på dialekt og nynorsk og er kjend for sine nære, varme, humoristiske og ofte samfunnskritiske tekstar.

Bakgrunn

Geirr Lystrup vaks opp i Vinje i Telemark. Han er son til presten og biletkunstnaren Sigmund Lystrup. Sidan 1983 er han busett i Brumunddal. Han tok examen artium ved Oslo katedralskole i 1968 og utdanna seg til lærar.

Visesongar

Geirr Lystrup
Geirr Lystrup under ein konsert på Chateau Neuf i 1979
Av /Nasjonalbiblioteket.
Lisens: CC PDM

Karrieren som visesongar byrja han i Vinje. Han fekk avgjerande impulsar frå det sterke folkemusikkmiljøet i Telemark. Ti på taket og måltrostblues (1972) var debutplata hans, og med det markerte han seg innanfor den norske visebølgja i 1970-åra. Med instrumentalplata Strengleikar (1973) stod han fram som klassisk gitarist. Plata I menneskenes land (1979) var inspirert av eit lengre opphald på Grønland. I alt har han gitt ut nærmare tretti album.

Fleire av plateutgivingane tek opp folke- og tradisjonsmusikk. På albumet Ha ti dæ! (1983) dikta Lystrup nye tekstar til gamaldansmelodiar frå Gudbrandsdalen, eit resultat av eit samarbeid med folkemusikarar i Lom. Han har vore med i den nordiske folkemusikkgruppa Kvedar og har gitt ut folkeviser i bokform, Min Visebag. Folkeviser fra hele landet (1990).

Samarbeid og tonesetjingar

Som visesongar har Lystrup spela inn fleire album saman med gruppa si, Godtfolk, mellom anna Egg & champagne (1988) og Sommar i september (1992). Han har skrive tekst til fem album med Per Oddvar Hildre og Det Norske Kammerkor. Lystrup har òg samarbeidd med Henning Sommerro, SKRUK og Moskva Balalaika Quartet. I samband med hundreårjubileet for Tarjei Vesaas sette Lystrup melodi til tjue Vesaas-dikt. Han har spela inn album med songar av telemarkingane Halvor J. Sandsdalen og Sigmund Groven, Kom sol på alle mine berg (1981).

Musikk, teater og bøker for barn

Lystrup har skrive fleire teaterstykke, dei fleste for barn, og har spela inn ei rekkje barneplater. Stykket Brakar og Joanna var Riksteateret si familieframsyning i samband med 50-årsjubileet i 1999. Radioversjonen vann Prix Nordica for beste radioprogram.

Han har gitt ut fleire barneplater i samarbeid med hjelpeorganisasjonen FORUT, og han har hatt stor suksess med julekonserten Stjerna fra øst, som fortel juleevangeliet som eit nordisk vintereventyr til russiske folketonar. Dessutan har han skrive fleire barnebøker, den nyaste er Da bestefar ble ape (2018). Barnevisene har han gitt ut i den store Barnesangboka mi (2009). 270 av visene sine har han samla i Viseboka mi (2008). I dei seinare åra har han òg skrive salmar, som er gitt ut i Salmeboka mi (2010).

Hans største hit på Norsktoppen er Lite morgonbrev (1973).

Prisar

Geirr Lystrup er tildelt fleire prisar, mellom anna Prøysenprisen i 1987 og Hedmark fylkeskommunes kulturpris i 2010. Han har fått Spellemannprisen fem gonger, mellom anna for tre av barneplatene sine.

Les meir i Store norske leksikon

Eksterne lenker

Kommentarar (2)

skreiv Lars S. Vikør

Om Geirr Lystrups personalia:

"Foreldre: Prest og kunstmaler Sigmund Lystrup (1909–) og husmor Gina Lystrup (1923–).

Gift 1975 med tannlege og akupunktør Siri Thesen (29.5.1950–), datter av lektor Olaf Thesen (1918–) og husmor Synnøve Viksmoen (1923–)."

Kan det stemme at alle i denne foreldregenerasjonen framleis er i live? Sterke slekter, men likevel?

svarte Jon Vidar Bergan

Takk for innspill. Jeg greide å finne dødsår for Geirrs foreldre. Men ikke dødsår for hans kones foreldre

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg