Målvinarlaget var eit mållag skipa i 1877 ved lærarskulen på Stord. Det sovna inn vel 100 år seinare og vart det eldste elevmållaget i landet.
Faktaboks
- Også kjend som
-
Maalvinarlaget
Maalvinarlaget ved seminariet på Stord vart skipa i januar 1877. Det var det første levedyktige elevmållaget i landet. Alt frå slutten av 1860-åra hadde det teke til å vekse fram landsmålsmiljø ved somme av lærarseminaria. Og både ved seminariet på Stord og ved seminariet i Asker vart det skipa mållag rundt 1872, men desse laga voks ikkje opp.
I dei første åra var møta til Maalvinarlaget (målvenelaget) arbeidsmøte der medlemene lærde kvarandre landsmål. Laget bygde opp si eiga boksamling, hadde sitt eige handskrive blad, Maalvinen, arbeidde for landsmål som undervisningsemne ved seminaria og kravde vitnemål på landsmål.
Frå starten og like ut i 1940-åra var innkjøp og utlån av bøker på nynorsk ein sentral del av verksemda. Boklista omfatta på det meste 415 titlar. Etter andre verdskrigen var 1960-åra ein særleg aktiv periode, deretter vart det stillare. Mållaget vart over 100 år gamalt. Det markerte jubileet i 1977, men sovna så etter kvart inn.
Etter skipinga av Maalvinarlaget i 1877 kom det andre seminariemållag til. I 1878 stifta elevar ved seminariet i Kristiansand Maalreisningssamlaget, og både Maalvinarlaget og Maalreisningssamlaget var medlemer i Det Norske Samlaget. I 1888 vart det meldt om eit mållag ved seminariet i Asker, og i 1890-åra vart det starta lag ved seminaria i Elverum, Volda, Levanger og Tromsø.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.