Karmøy-Bladet

Det var eit par forsøk på å starte lokalaviser på Karmøy i byrjinga 1900-talet: I 1904 grunnla skreddar Gabriel Wold Karmøens Tidende, som heldt det gåande med nokre avbrot til 1916, og i 1912 oppstod Kopervik Tidende, som eksisterte til 1931. Karmø-Posten blei etablert i 1911 i form av eit aksjeselskap, med Audun H. Telnæs som første redaktør.

Avisa hadde vekslande redaktørar fram til 1919, då Hans Tunge og Hilding Lanton overtok. I 1910 flytta åtte år gamle Lanton med dei svenske foreldra sine frå Örebro til Kopervik. Faren var typograf, og Hilding Lanton gjekk i typograflære i Kopervik Tidende. 16 år gamal debuterte han som skrivande journalist, og seinare blei han både utgivar og redaktør.

Lanton og Tunge døypte avisa om til Karmøy-Posten, noko som førte til kritikk frå riksmålsvenlege krinsar. I 1921 overtok Lanton avisa åleine. Bladet kom ut i Kopervik ein gong i veka og hadde sitt eige trykkjeri. Karmøy-Posten avslutta verksemda i 1939 og vart slått saman med Haugesunds Dagblad. Under andre verdskrigen blei Hilding Lanton innsett som redaktør i Haugesunds-Pressen, av okkupasjonsmakta samanslått av Haugesunds Avis og Haugesunds Dagblad. Det politiske engasjementet hans var likevel av ein passiv og «ufarleg» karakter.

Då Lanton i desember 1954 sette i gang med avisa Karmøy-Bladet, med sonen Karl Lanton som utgivar, fekk den nye avisa ei positiv mottaking. Avisa var erklært som «upolitisk lokalblad» og kom ut ein gong i veka. Hilding Lanton var redaktør til han selde Karmøy-Bladet i 1971.

Avisa blei trykt i Karmøy-Posten sitt gamle trykkjeri og heldt det gåande ein gong i veka med fire sider, fram til 1971. Då blei Karmøy-Bladet overteke av arbeidarpressa, etter at det frå lokalpolitisk hald i Karmøy frå tidleg i 1960-åra var teke kontakt med utgivarane. Frå no av markerte Karmøy-Bladet seg ganske annleis, både politisk og nyhendemessig. Den første redaktøren blei Olav M. Wikre, ein framståande lokalpolitikar som i det første nummeret retta ein takk til Hilding Lanton for «trofast virke i lokalpressen i over 40 år». Avisa blei no trykt i Rogalands Avis og seinare i Odda i offset og tabloidformat. Sidetalet kom opp i åtte, og nokså snart kom avisa ut to gonger i veka.

Etter at Wikre døydde i 1973 blei Terje Emil Johannessen frå Haugesund redaktør. Han blei ved årsskiftet 1974–1975 etterfølgd av John Sjursen frå Arendal, som blei tilsett som redaksjonssjef i Arbeiderbladet i Oslo i 1976. Deretter kom Kåre Rennestraum, også han frå Arendal, i august 1977, etterfølgd av Kåre Ludvig Hansen, som sat til februar 1978. Deretter følgde Nils Erik Langva frå Ålesund. Han var den første som også blei disponent i tillegg til redaktørjobben. Han verka til årsskiftet 1983–1984, og etter han kom Odd Atle Urvik frå Haugesund.

Urvik gjorde det klart at Karmøy-Bladet først og fremst skulle vere ei lokalavis, utan nokon tydeleg partipolitisk profil. I leiarartikkelen julaftan 1985 blir det optimistisk slått fast at avisa skal utvide til tre utgåver i veka. Sommaren 1987 var det likevel slutt.