Midnattsol var eit frilyndt nynorsk ungdomsblad som kom ut i Harstad frå 1916 til 1963.

Historie

Tidleg på 1900-talet oppstod det eit landsmålsmiljø i Lofoten og Vesterålen som mellom anna gav ut blad og aviser. Eit av desse blada var ungdomsbladet Midnattsol i Harstad, som vart eit bindeledd for målfolket i landsdelen. Etter eit prøvenummer i 1915 kom bladet ut regelmessig éin gong i veka. Det var på fire sider og hadde undertittelen «Ungdomsblad for Nord-Norig».

Midnattsol var ei tid det største frilynde ungdomsbladet i landet. Ingvald Forsberg var den første redaktøren. Hans Eidnes, seinare stortingsrepresentant og leiar i Noregs Mållag, redigerte bladet i åra 1919–29. Frå 1933 til slutten av 1940-åra gav Midnattsol ut juleheftet Jul i Hålogaland. Bladet vart i periodar støtta økonomisk av ungdomslaga i Lofoten, Vesterålen og Troms.

I 1941 valde bladet å stoppe heller enn å la seg presse til å ta inn stoff som okkupasjonsmakta ville ha dei til å trykkje. I oktober 1945 var bladet tilbake, men kom noko uregelmessig dei første etterkrigsåra, for så å kome regelmessig annakvar veke. Opplaget var då noko under 6000 eksemplar.

Men utover i 1950-åra miste nynorsken mange av dei skansane han hadde vunne i Nord-Noreg. Det fekk også Midnattsol merke. Det vart underskot, tingarar fall frå, og redaktør gjennom mange år, Marius Evjeberg, trekte seg i 1963. Nummeret som kom 21. desember 1963, vart det siste som Evjeberg redigerte.

Les meir i Store norske leksikon

Litteratur

  • Grepstad, O. (2010): Avisene som utvida Noreg. Nynorskpressa 1850–2010. Oslo: Universitetsforlaget

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg