Avisa Sogndal

Avisa Sogndal vart skipa og driven av A-pressa (no Amedia) og skulle fylle tomrommet etter at forgjengaren, Sogn Dagblad, vart lagd ned. Det skulle vere ei politisk uavhengig vekeavis, og den første utgåva kom sommaren 1997.

Einaste redaktør for avisa var Torbjørn Rørvik. Han hadde tidlegare arbeidd i Sogn Dagblad. To journalistar og ein annonsekonsulent var òg tilsette frå starten. Avisa vart utgitt på nynorsk. Trykkeriet var Firda Trykk i Førde. Opplagstalet for 1998 var 1708.

Ein særs lokal profil gjorde at Avisa Sogndal fekk få lesarar. Det vart difor aldri skikkeleg sving på økonomien, og underskotet var eit faktum etter kort tid. Nedlegginga følgde etter det som vart kalla årets avishandel i Sogn: Samstundes som A-pressa la ned Avisa Sogndal, selde mediekonsernet også Årdal og Lærdal Avis til konkurrenten Sogn Avis – som var den nest største og mest lønsame lokalavisa i Sogn og Fjordane. Som betaling fekk A-pressa delar av aksjane i Sogn Avis. Nedlegginga av Avisa Sogndal medverka med dette til både mindre mangfald og mindre konkurranse i avismiljøet i området.

• Sogn Dagblad
• Sogn Avis
• Årdal og Lærdal Avis
• Amedia
• massemedier i Norge
• norsk presses historie
• avis

• Eggum, T. (2009): På trykk. Avisene i Sogn og Fjordane 1874–2009. Førde: Selja Forlag