Hardanger Bygdeblad var ei avis som kom ut i Norheimsund frå 1931 til 1967.
Hardanger Bygdeblad
Bladets fyrste redaktør, Peder Simonsen Eikrem (1876–1956), er identisk med ein markant Kinamisjonær og misjonsbokforfattar. Han er mannen bak Kinas aapne dør, ei misjonsbok mykje referert til frå 1916. Han gjorde teneste på misjonsmarkene i Kina frå 1902 til 1914. Seinare reiste han i mange år for Kinamisjonsforbundet i Hardanger og Sunnhordlands krins. Han kjende distriktet godt frå tida si ved forbundet sin misjonsskule på Framnes i Norheimsund. Innan han blei Hardanger Bygdeblad sin fyrste redaktør i 1931, sat han i to periodar som styrar ved Bibelskulen i Bergen. Han sat berre kort tid som bladstyrar. Mest truleg har P. S. Eikrem si rolle vore å dra i gang det nye bladet. Han definerte, til liks med lekmannsmiljøet, bladtiltaket som ei overordna oppgåve i tidas rådande mediebilete.
Hardanger Bygdeblad fyrste redaktør, Peder Simonsen Eikrem.
Norsk presses historie.
Lisens:
Avgrensa gjenbruk
Historie
Bladet blei skipa for å balansere den etablerte avisa i regionen, Hordaland Folkeblad. Begge hadde ståstad i Norheimsund, i Kvam kommune. Sistnemnde sin 30 år lange aleinegang i Ytre Hardanger blei no, sist på året i 1931, utfordra av krefter med tett hopehav til lekmannsrørsla.
Hardanger Bygdeblad steig fram parallelt med det nye partiet i norsk politikk, Kristeleg Folkeparti. Avisa og partiet var runne av same kulturen, og i den same regionen, Hardanger og Midthordlands-bygdene. Det var med denne regionen som basis bibelskulestyrar Nils Lavik blei vald inn på Stortinget i 1933, som første KrF-representant. Men det nye bygdebladet blei ikkje eit partiorgan, tiltaket la snarare vekt på å understreke fråveret av partilojalitet.
Skipa i opposisjon
Det var likevel ingen tvil om kva plattform Hardanger Bygdeblad rigga for dei vel tretti åra bladet skulle eksistere. Skaar-lina i den etablerte Venstre-avisa, Hordaland Folkeblad frå 1901, men med røter på 1870-talet, var sekulær og lite mottakeleg for impulsar frå kristelege miljø. Hardanger Bygdeblad blei skipa i opposisjon til denne profilen.
Det nye bladet erklærte høg beredskap på preikeliste, avhaldslag, indre- og ytremisjon og mållag. Utgjevaren erklærte ei avis som skulle stø byggjande krefter og «strida mot dei makter som vil riva ned og øyda det gode i folk og land».
Bladet delte lagnad med mange under andre verdskrigen og gjekk mellombels inn i 1942. Like før midtsommars i 1945 var Hardanger Bygdeblad i gang att, med indremisjonsmannen Arne Wilhelmsen som bladstyrar, fyrst mellombels, men frå 1950 avisas levetid heilt ut.
Avisa heldt fast ved det skarpt teikna terrenget, omhyggjeleg definert frå starten. Tidas ungdomslag, dei frilynde, var såleis massivt fråverande i Bygdebladet sine spalter. Arne Wilhelmsen må ha bore bladet atskillege år på overtid. Men i 1967 var tida ute, og Hardanger Bygdeblad gjekk inn. Bladet kom aldri med i dei notarialt førte opplagslistene, men har truleg runda eit opplag på 1400 ved inngangen til 1950-talet.
Fakta
- Fyrste nr. 5.12.1931, førebels siste nr. 18.4.1942.
- Fyrste nr. etter krigen 6.6.1945, siste nr. 14.1.1967.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.