Nils T. Bjørke er bonde, tidlegare leiar i Noregs Bondelag og stortingsrepresentant for Senterpartiet (Sp) frå Hordaland sidan 2017.
Nils T. Bjørke
Faktaboks
- Fødd
- 9. mars 1959, Voss, Vestland
Bakgrunn
Nils T. Bjørke er fødd på Voss i Hordaland (no Vestland). Han er utdanna agronom frå Voss jordbruksskule. Frå 1975 til 1990 arbeidde Bjørke som avløysar og hovslagar. Han har vore bonde sidan 1990 og driv gard på Voss med oppdrett av travhestar, mjølkeproduksjon og sauer.
Politisk karriere
Bjørke var vald til medlem av kommunestyret for Senterpartiet på Voss for perioden 2015–2019 og medlem av fylkestinget i Hordaland i same periode. Bjørke er innvald som stortingsrepresentant for Senterpartiet frå Hordaland sidan 2017. På Stortinget er Bjørke medlem av kontroll- og konstitusjonskomiteen, der han var andre nestleiar i perioden 2017–2021. Han var fjerde visepresident på Stortinget i 2017–2021 og andre visepresident i 2021–2022. Som politikar er Bjørke spesielt oppteken av landbrukspolitikk.
Andre verv
Han har mykje organisasjonserfaring, mellom anna frå Noregs Bondelag. Bjørke var leiar av Voss Bondelag i 1990–1993 og av Hordaland Bondelag i 2000–2006. Han var medlem, så nestleiar i 2006–2008, og deretter leiar av Noregs Bondelag i 2009–2014. Bjørke var kontaktutvalsleiar i Nortura i 2006–2008 og styremedlem i Innovasjon Noreg Hordaland i 2000–2009. Han har òg vore tillitsvald i Noregs Bygdeungdomslag på Voss, i Hordaland og nasjonalt.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.