Faktaboks

Tordis Maurstad
Tordis Elfrida Witzøe Maurstad
Fødd
24. desember 1901, Kristiansund
Død
10. januar 1997, Oslo
Verke
Skodespelar
Familie

Foreldre: Driftsstyrar Albert Lauritz Witzøe (1867–1946) og Anna Marie Bjerkestrand (1869–1942).

Gift 1) 11.4.1925 med skodespelar Alfred Maurstad (1896–1967), ekteskapet oppløyst 1943; 2) 1949 med forfattar Helge Krog (1889–1962).

Mor til Toralv Maurstad (1926–).

Tordis Maurstad
Tordis Maurstad
Av .
Frøken Julie
Tordis Maurstad som Julie i Frøken Julie på Det norske teatret 1951.
Av /Dagbladet/Norsk Folkemuseum.
Lisens: CC BY NC ND 4.0

Tordis Maurstad var ein norsk skodespelar. Ho debuterte i 1923, som Sara i Johan Falkbergets Fjellsjøheidningen, på teaterturnéen til Edvard DrabløsFlisa. Gjennom praktisk talt heile karrieren var ho ved Det Norske Teatret, der ho hadde mykje å seie som ein av dei mest særprega kunstnarane i ensemblet i eit krevjande repertoar.

Ho viste talentet sitt i roller som Evelinde og Helga i Arne Garborgs Læraren og dessutan i tittelrollene i Eugene O'Neills Anna Christie, August Strindbergs Frøken Julie og Federico García Lorcas Yerma. I tillegg kjem fru Stordal i Kranes konditori, Alice i Strindbergs Dødsdansen, Mary Tyrone i O'Neills Lang dags ferd mot natt og fru Alving i Henrik Ibsens Gengangere – den siste også i TV. Lang dags ferd mot natt fekk ho dessutan Kritikerprisen for i 1962.

Ho viste ein spesiell evne til å vere lydhøyr for stemningane i Anton Tsjekhovs skodespel, som Sonja i Onkel Vanja, Masja i Tre systrer, Arkadina i Måken og godseigarfrua i Kirsebærhaven. I tillegg tolka ho roller i antikke drama, som tittelrollene i Antigone og Medeia, og i renessansestykke, som William Shakespeare-karakterane Rosalinde i As You Like It og Olivia i Twelfth Night.

I moderne nynorske drama av Tore Ørjasæter, Tarjei Vesaas og Aslaug Vaa var ho ein kjenslevar psykolog med menneskekunnskap og poetisk sans.

Ho var først gift med Alfred Maurstad og deretter med Helge Krog, og ho var mor til Toralv Maurstad.

Les meir i Store norske leksikon

Faktaboks

Tordis Maurstad
Historisk befolkingsregister-ID
pf01036748000525

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg