R

Rolf Reikvam, tidlegare sentral politikar i SV som var særleg oppteken av utdanningspolitiske spørsmål.

Hildegun Riise, songar og skodespelar. Ho er fast tilsett ved Det Norske Teatret og har nådd breitt ut i mange kanalar og medium.

Heidi Grande Røys, politikar frå Sunnfjord som har representert SV på både lokal- og riksnivå.

Eldbjørg Raknes, jazzvokalist, med innovativ akustisk stemmebruk som fremste varemerke.

Audhild Gregoriusdotter Rotevatn, journalist og dekan ved avdeling for mediefag ved Høgskulen i Volda, er ein språksikker og allsidig medieprofil med eige huglaug (fanklubb). 

Magne Rommetveit, ordbokredaktør og organisasjonsleiar. Han organiserte ein konkurrent til Noregs Mållag i 1955, men blei seinare heidersmedlem i Noregs Mållag.

Olav Georg Martinus Rusti, teiknar, målar og målmann, busett i Tyskland i nesten tjue år, halvparten av denne tida levde han tilbaketrekt i eit nedlagt kloster.

Hans Matthias Elisæus Ross var teolog, språklærar, folkeminnesamlar og ordboksredaktør. Han førte vidare og utvida Ivar Aasens samling av norske ord.

Ivar Refsdal, lærar og kartograf. Som kartteiknar var han nyskapande i måten å framstille karta sine på, der fag og kunstnarleg uttrykk vart vovne i hop på ein pedagogisk velutvikla måte.

Gunnvor Rundhovde, filolog og dialektforskar. Forskinga resulterte i eit doktorarbeid, og ho var den første kvinna som disputerte ved Universitetet i Bergen.

Frank Henrik Rolland, hardingfelespelar frå Hardanger og fylkesmusikar i Hordaland.

Oddlaug Reiakvam, etnolog med eit spesielt blikk for kva eldre fotografi kan fortelje oss.

Jacob Rasch, skulemann og språkmann. Han samla ord frå stavangerdialekten og omsette delar av Romarbrevet til jærdialekt.

Egil Johan Ree, programmedarbeidar i NRK. Han var ein stilkresen kåsør og ein framifrå radiojournalist.

Aani Rysstad, pressemann, som var den første redaktøren i Nynorsk Pressekontor.

Anne Raknes var ein av dei første kvinnelege bilethoggarane i Noreg, og ho var oppteken av fagforeiningsarbeid og mellom initiativtakarane til Norsk Billedhoggerforening.

Rasmus Olai Rasmussen, den første sjefen ved Det Norske Teatret og den viktigaste skodespelaren i opningssesongen.

Amund Rydland, skodespelar og teatersjef ved Det Norske Teatret.

Per Riste, lærar, gardbrukar, målmann og norskdomsmann, oppretta «målskule» i Volda, der han saman med kona Synnøve Riste og Rasmus Steinsvik stod i spissen for eit radikalt miljø.

Trygve Ræder, historikar og skulemann. Han var rektor ved Orkdal landsgymnas (no Orkdal vidaregåande skole) i 22 år.