Anders Viken var fødd i Jølster 6. juli 1898, gjekk lærarskulen i Volda og var folkeskulelærar i Jølster frå 1930 til han nådde aldersgrensa. Han døydde i Jølster i 1977. Viken komponerte over 300 slåttar. Spesielt kjende er «Jølstrabrura», «Huldresølvet» og «Brulandsvalsen». Faren, Ole Olsen Viken, var òg spelemann, og sonen Arne førte Viken-tradisjonen vidare med mange innspelingar.

 

Viken ville utvikle folkemusikken. Sjølv lét han byggje, og spela på, eit instrument som var ein mellomting mellom vanleg fele og hardingfele, det han kalla «ideal-fela». Musikken er inspirert av Jølster-naturen og vart mykje omtykt. Komposisjonane er prega av posisjonsspel og dobbelgrep. Titlane er gjerne humoristiske. Særleg «Jølstrabrura» vart landskjend og var mykje spela i den populære Ønskekonserten på NRK i mange år.

 

Anders Viken fekk Kongens fortenestemedalje i gull. Ei byste av han vart sett opp på fødestaden Skei i Jølster ved 100-årsjubileet i 1998.

  

Arne Viken (red.): Anders Viken. Jubileumsalbum 1898–1998. Oslo 1998

Først publisert: 14.02.2011
Sist oppdatert: 25.04.2013