Tor Arve Røssland
Tor Arve Røssland.
Av /Samlaget.

Tor Arve Røssland er ein norsk forfattar. Han skriv barne- og ungdomslitteratur, mellom anna bøkene om guten Pode.

Bakgrunn

Tor Arve Røssland er fødd i Bergen, oppvaksen på Husnes i Kvinnherad og busett på Halhjem i Bjørnafjorden. Han har hovudfag i filmvitskap frå NTNU med oppgåva ... vond og pervers ... Debatten om filmsensur i Norge på 1900-tallet (1997). Tilleggsfaga er litteraturvitskap og mediepedagogikk. Sidan 2011 har han vore forfattar på heiltid.

Forfattarskap

Røssland debuterte i 1999 med barneboka Pode. Boka om seks år gamle Pode er omsett til tysk, og det er kome fire andre bøker i serien: Pode mister fotfestet (2002), Pode får snue (2002) Anti-Pode (2006) og samleutgåva Absolutt Pode (2020). Bøkene, som er illustrerte av Øyvind Torseter, er humoristiske med kvardagsleg surrealisme og elegant språk.

I 2004 kom ungdomsromanen Plutselig skjøna eg alle songane, om ein 17-åring som plutseleg skjøner djupna i poptekstar. Lettlesboka om barna Figaro og Aida, På rømmen i New York, blei utgitt i 2008.

Ungdomsgrøssaren Svarte-Mathilda (2010) blei nominert til Uprisen for årets ungdomsbok i 2011. Boka er psykologisk kompleks med eit særprega språk. Det er ei mystisk og uoppklart detektivgåte med utgangspunkt i ei urban legende om ei tenåringsjente som blei drepen for 20 år sidan. I 2012 og 2013 kom dei to neste bøkene i trilogien, Svarte Mathilda II og Svarte-Mathilda III.

I 2014 blei En smak av zommer lansert som første bok i Grusom-serien, ein grøssarserie for ungdom. Bømlo, som er heimstaden til 16 år gamle Max, blir invadert av menneskeetande zombiar.

I 2015 var Soledad (2014) bland dei nominerte til Uprisen, og i 2019 blei Glimt (2015) kåra til ei av dei ti beste ungdomsbøkene som er skrivne på nynorsk etter år 2000.

Utgivingar

  • Overleve bok 1 - Vulkanen vaknar (Barnebok, Samlaget, 2022)
  • Jegeren (Ungdomsbok, Mangschou forlag, 2021)
  • Absolutt Pode (Barnebok, Samlaget, 2020)
  • Kodeord Overlord (Barnebok, Vigmostad & Bjørke, 2019)
  • Den tolvte spelaren (Ungdomsbok, Samlaget, 2018)
  • Dronen (Ungdomsbok, Mangschou forlag, 2017)
  • Glimt (Ungdomsbok, Samlaget, 2015)
  • Snatch (Ungdomsbok, Mangschou forlag, 2014)
  • Soledad (Ungdomsbok, Aschehoug, 2014)
  • En smak av zommer (Ungdomsbok, Egmont, 2014)
  • Svarte-Mathilda 3 (Ungdomsbok, Samlaget, 2013)
  • Svarte-Mathilda 2 (Ungdomsbok, Samlaget, 2012)
  • Gamer (Ungdomsbok, Mangschou forlag, 2011)
  • Svarte-Mathilda (Ungdomsbok, Samlaget, 2010)
  • På rømmen i New York (Barnebok, Samlaget, 2008)
  • Anti-Pode (Barnebok, Samlaget, 2006)
  • Plutselig skjøna eg alle songane (Roman, Samlaget, 2004)
  • Pode får snue (Barnebok, Samlaget, 2002)
  • Pode mister fotfestet (Barnebok, Samlaget, 2000)
  • Pode (Barnebok, Samlaget, 1999)

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg