Hans Kårhus

Hans Kårhus tok examen artium på Bryne i 1963, lærarprøva ved Stavanger lærarskule i 1967 og blei cand.philol. ved Universitetet i Oslo i 1975, med tysk hovudfag og engelsk mellomfag. I avhandlinga analyserte han feil som norske studentar gjorde når dei skreiv tysk.

Kårhus arbeidde som frilans tv-tekstar i NRK i perioden 1973 til 2003 og utførte fleire tusen oppdrag med høg profesjonalitet og stor arbeidskapasitet – mest seriar, men òg litt sport og utanriksstoff. Mest teksta han frå tysk og engelsk, det meste på nynorsk. Han fekk heile det norske folket som publikum med si teksting av «Derrick», som gjekk på norsk fjernsyn i heile 22 år (1977–1998), med reprise av alle 281 episodane frå 2009.

Meir populær blei kanskje serien «Forviklingar» (Soap), ein parodi på amerikanske såpeoperaer. Kårhus kledde all skjemten og ordspela i originalen i ei elegant språkform, slik at nokon knapt reagerte på at ein komiserie for første gong blei teksta på nynorsk. Kanskje var det her nynorsk fekk sitt definitive gjennombrot i fjernsynssend underhaldning.

Som junior gjorde Kårhus det godt i friidrett. Han blei norsk meister, sette fleire norske rekordar og var med i nordiske landskampar.

• teksting
• oversettelse
• Derrick
• TV